Pałonnaja Nadzieja Saŭčanka napisała list padtrymki ŭkrainskim žaŭnieram
Ukrainskaja lotčyca Nadzieja Saŭčanka, uziataja ŭ pałon na Danbasie i nielehalna pierapraŭlenaja praź miažu ŭ rasijskuju turmu, adpraviła list ŭ padtrymku ŭkrainskich vajskoŭcaŭ, jakija zmahajucca na froncie suprać rasijskaj ahresii.
«Ja b žyćcio addała, tolki b apynucca na pieradavoj pobač z vami, u akopach… Jak by toje nie było ciažka, dla mianie pobač z vami ŭsio było b lohka. I pryniać popleč z vami boj suprać voraha, navat apošni ŭ maim žyćci, dla mianie budzie honar», — napisała žančyna, jakaja latała na bambardziroŭščyku Su-24 i ŭdarnym viertalocie Mi-24.
«A vy maładcy, chłopcy! Trymajciesia! Usie maładcy, chto nie spužaŭsia pajści na front, a pra kibarhaŭ-kazakoŭ, što Daniecki aeraport abaraniajuć, uvohule lahiendy chodziać! Zdymaju kapialuš, chłopcy», — dadała Nadzieja.
«Ale duža prašu adnaho, chłopcy — nie rabiciesia źviarami. Va ŭsich svaich dziejańniach i dumkach zastavajciesia ludźmi. Bo hetaja praklataja vajna rana ci pozna skončycca, i kali vyžyvieš, to samomu z saboj jašče ŭsio žyćcio žyć», — havorycca ŭ liście.
Užo padčas svajho pałonu Nadzieja Saŭčanka była abranaja deputatam u Viarchoŭnuju Radu Ŭkrainy i atrymała orden «Za mužnaść» 3 stupieni. U Rasii jaje abvinavačvajuć u tym, što jana była karektyroŭščycaj, kali 17 červienia 2014 hodu padčas minamiotnaha abstrełu pad Łuhanskam zahinuli rasijskija žurnalisty.
«Budiem žiť!» — zakančvaje svoj list Nadzieja cytataj z savieckaha filma «U boj iduć adno staryja» na rasijskaj movie. Z hetaj frazaj lotčyk-ukrainiec u filmie nakiroŭvaje svoj padbity samalot na transpartnuju kałonu voraha.
Kamientary