Juryj Zisier: Revalucyjnych pieramien u bajnecie ŭžo nie budzie

Revalucyjnych pieramien u bajnecie, napeŭna, užo nie budzie. Takoje mierkavańnie vykazaŭ zasnavalnik najbujniejšaha biełaruskaha internet-partała tut.by 9 kastryčnika ŭ Minsku na bryfinhu ŭ miežach štohadovaj kanfierencyi «Dziełavy internet», jakaja arhanizujecca partałam. 

«Internet — nieadjemnaja častka žyćcia. Aŭdytoryja sioleta stabilizavałasia. U internet pryjšli «staryja». Čamuści dahetul nivodny vymiaralnik nie daśleduje admysłovuju aŭdytoryju — dziaciej da 15 hadoŭ, choć vielmi mnohija ź ich karystajucca internetam, i my heta viedajem», — adznačyŭ Zisier. 

«Ale što my bačym — pavialičyłasia sutačnaje spažyvańnie internetu. U siarednim biełarusy «chodziać» u internet praź dzień. Ja dumaju, što prahres u hetym sensie budzie iści», — miarkuje ekśpiert. 

Jon taksama źviarnuŭ uvahu na jašče adzin jaŭny trend raźvićcia internetu — na jaho «mabilizacyju». «Pažyłym, napeŭna, ciažej avałodać mabilnymi pryładami dostupu ŭ internet, ale maładziejšyja ŭsio bolš karystajucca smartfonami, płanšetami dla internet-dostupu. Tak što «mabilizacyja» — heta jaŭny trend, jaki praciahvajecca», — skazaŭ Zisier. 

«Internet staŭ štodzionnaściu, i niejkich revalucyjnych pieramien, napeŭna, užo nie budzie», — dadaŭ ekśpiert. 

Pry hetym, pavodle jaho słoŭ, u biełaruskim internecie pa-raniejšamu ŭsio jašče vielmi mała hrošaj — heta hałoŭny tormaz jaho raźvićcia. 

«Vielmi mała biełaruskich miedyjaresursaŭ mohuć vyžyć na rekłamnyja hrošy. Zatoje šmat hrošaj idzie na kamiercyju, hulni, pasłuhi i hetak dalej», — adznačyŭ Zisier. U hetym kirunku, pavodle jaho mierkavańnia, i varta čakać dalejšaha raźvićcia bajnetu. 

Jak było paviedamlena na «Dziełavym internecie» sa spasyłkaj na źviestki daśledavańniaŭ kampanii Gemius, kolkaść karystalnikaŭ internetu ŭ Biełarusi za hod praktyčna nie źmianiłasia i składaje krychu mienš za 5 miljonaŭ. Uzrovień praniknieńnia internetu ŭ Biełarusi składaje 71%. Niahledziačy na nievialikija tempy rostu aŭdytoryi, kolkaść biełarusaŭ, jakija karystajucca internetam štodnia, vyrasła na 15% i składaje prykładna 3 miljony. 

Pry hetym bajnet praciahvaje «stareć»: va ŭzrostavaj hrupie 15—74 internet-karystalnikaŭ 71%; 13% usich internet-karystalnikaŭ u śviecie, jakim bolš za 55 hadoŭ, u Biełarusi — 10%; kožny piaty piensijanier u Biełarusi karystajecca internetam.

• 0
• 0
• 0
• 0
• 0
• 0
• 0
• 0