31 lipienia — apošni dzień padačy zajavak u škołu Ruchu «Za Svabodu» «Biełaruskaja ideja i šlachi nacyjanalnaj kansalidacyi ŭ Biełarusi»
Škoła adbudziecca 24-29 žniŭnia 2014 h. na Vilenščynie z udziełam viadomych biełaruskich ekśpiertaŭ, hramadskich dziejačaŭ i palitykaŭ.
Meta Škoły – vyvučyć i abmierkavać asnoŭnyja składniki biełaruskaj nacyjanalnaj idei, razhledzieć patencyjał i mahčymaści dla kansalidacyi biełarusaŭ u śviatle novych pahrozaŭ i vyklikaŭ dla dziaržaŭnaści i roskvitu našaj krainy.
«Heta čaćviortaja pa liku škoła, jakuju pravodzić Ruch, – kaža jaje dyrektar Aleś Łahviniec, namieśnik staršyni Ruchu. – Pieršaja adbyłasia ŭ lipieni 2011 hodu ŭ Varšavie, druhaja – u Vilni, a treciaja – letaś na Biełastoččynie ŭ Polščy. Našy Škoły karystajucca popytam i ŭžo majuć svaju nievialikuju tradycyju, u ich vykładajuć viadomyja ŭ Biełarusi i za miažoj ekśpierty. Kožnaja Škoła maje svaju tematyku. Tema sioletniaj škoły jak nikoli aktualnaja – «Biełaruskaja ideja i šlachi nacyjanalnaj kansalidacyi ŭ Biełarusi».
Navučańnie praciahniecca amal tydzień. Prahrama – nasyčanaja i raznastajnaja, kaža Łahviniec. «My budziem spałučać roznyja navučalnyja mietady, budzie miesca i dla aktyŭnaha adpačynku dy ekskursijaŭ», - raspaviadaje jon. «Samaje hałoŭnaje, kab naša moładź lepiej viedała historyju i biełaruskija tradycyi i lepiej adčuvała poviaź ź imi», - padsumoŭvaje Aleś Łahviniec.
U hetym hodzie lekcyi ŭ miežach škoły pračytajuć šerah ekśpiertaŭ. Siarod ich biełaruski piśmieńnik, paet i historyk Uładzimir Arłoŭ, biełaruskija historyki, doktary histaryčnych navuk Aleś Kraŭcevič i Aleś Smalančuk, ekanamist Siarhiej Čały, staršynia Ruchu «Za Svabodu» Alaksandr Milinkievič, žurnalist Alaksandr Kłaskoŭski, namieśnik dyrektara «CASE-Biełaruś» (Centr hramadzka-ekanamičnaj analityki) Aleś Alachnovič, daktarant mižnarodnych dačynieńniaŭ Varšaŭskaha univiersitetu i stvaralnik časopisu « Ideja» Ryhor Astapienia, zasnavalnik Centru Astrahorskaha i hałoŭny redaktar Belarus Digest Jarasłaŭ Kryvoj.
Udzieł u škole mohuć uziać hramadzianie Biełarusi va ŭzroście 18-30 hod, aktyŭnyja ŭ hramadskaj i/abo palityčnaj śfiery. Pracoŭnaja mova - biełaruskaja. Arhanizatary pakryvajuć vydatki na prajezd i pražyvańnie.
Zajaŭki na ŭdzieł u Škołu možna padavać da 31 lipienia. Zacikaŭlenym asobam treba zapoŭnić ankietu, adno z pytańniaŭ jakoj «Na maju dumku, kansalidavać biełaruskuju nacyju naležyć nastupnym čynam:» (ad 1800 da 3000 simvałaŭ).
Vyniki adboru buduć abvieščanyja 5 žniŭnia.
Dadatkovaja infarmacyja - [email protected] ci telefonie +375 29 606 10 34.
Kamientary