31 ліпеня — апошні дзень падачы заявак у школу Руху «За Свабоду» «Беларуская ідэя і шляхі нацыянальнай кансалідацыі ў Беларусі»
Школа адбудзецца 24-29 жніўня 2014 г. на Віленшчыне з удзелам вядомых беларускіх экспертаў, грамадскіх дзеячаў і палітыкаў.
Мэта Школы – вывучыць і абмеркаваць асноўныя складнікі беларускай нацыянальнай ідэі, разгледзець патэнцыял і магчымасці для кансалідацыі беларусаў у святле новых пагрозаў і выклікаў для дзяржаўнасці і росквіту нашай краіны.
«Гэта чацвёртая па ліку школа, якую праводзіць Рух, – кажа яе дырэктар Алесь Лагвінец, намеснік старшыні Руху. – Першая адбылася ў ліпені 2011 году ў Варшаве, другая – у Вільні, а трэцяя – летась на Беласточчыне ў Польшчы. Нашы Школы карыстаюцца попытам і ўжо маюць сваю невялікую традыцыю, у іх выкладаюць вядомыя ў Беларусі і за мяжой эксперты. Кожная Школа мае сваю тэматыку. Тэма сёлетняй школы як ніколі актуальная – «Беларуская ідэя і шляхі нацыянальнай кансалідацыі ў Беларусі».
Навучанне працягнецца амаль тыдзень. Праграма – насычаная і разнастайная, кажа Лагвінец. «Мы будзем спалучаць розныя навучальныя метады, будзе месца і для актыўнага адпачынку ды экскурсіяў», - распавядае ён. «Самае галоўнае, каб наша моладзь лепей ведала гісторыю і беларускія традыцыі і лепей адчувала повязь з імі», - падсумоўвае Алесь Лагвінец.
У гэтым годзе лекцыі ў межах школы прачытаюць шэраг экспертаў. Сярод іх беларускі пісьменнік, паэт і гісторык Уладзімір Арлоў, беларускія гісторыкі, доктары гістарычных навук Алесь Краўцэвіч і Алесь Смалянчук, эканаміст Сяргей Чалы, старшыня Руху «За Свабоду» Аляксандр Мілінкевіч, журналіст Аляксандр Класкоўскі, намеснік дырэктара «CASE-Беларусь» (Цэнтр грамадзка-эканамічнай аналітыкі) Алесь Аляхновіч, дактарант міжнародных дачыненняў Варшаўскага універсітэту і стваральнік часопісу « Ідэя» Рыгор Астапеня, заснавальнік Цэнтру Астрагорскага і галоўны рэдактар Belarus Digest Яраслаў Крывой.
Удзел у школе могуць узяць грамадзяне Беларусі ва ўзросце 18-30 год, актыўныя ў грамадскай і/або палітычнай сферы. Працоўная мова - беларуская. Арганізатары пакрываюць выдаткі на праезд і пражыванне.
Заяўкі на ўдзел у Школу можна падаваць да 31 ліпеня. Зацікаўленым асобам трэба запоўніць анкету, адно з пытанняў якой «На маю думку, кансалідаваць беларускую нацыю належыць наступным чынам:» (ад 1800 да 3000 сімвалаў).
Вынікі адбору будуць абвешчаныя 5 жніўня.
Дадатковая інфармацыя - [email protected] ці тэлефоне +375 29 606 10 34.
Каментары