Mały hrycuk pastaviŭ novy rekord bieśpierasadačnaha pieralotu

Mały hrycuk (Limosa lapponica) z umoŭnym imiem E7, jaki staŭsia znakamitym dziakujučy svajmu viasnovamu rekordnamu biezpasadačnamu pieralotu, niadaŭna pabiŭ svoj ža rekord! U hety raz pad čas mihracyi ź miescaŭ hniezdavańnia na Alascy ŭ Novuju Zelandyju na miescy zimoŭki. Rekord zaśviedčany spadarožnikavaj telemetryjaj.

Na praciahu siami miesiacaŭ hety mały hrycuk pralacieŭ 29.000 km — viartajučysia ź zimoŭki ŭ Novaj Zelandyi, praz Kitaj na Alasku, a ciapier nazad u Novuju Zelandyju.

Novy rekordny biezpasadačny pieralot adbyvaŭsia na praciahu 8 dzion pad, cieraź Cichi akijan na adlehłaść u 11.600 km!

«Hrycuki robiacca darosłymi ŝ vieku 3‑4 hadoŭ, i mnohija žyvuć bolš za 20 hadoŭ. Kali my prymiem, što dla małych hrycukoŭ 29.000 km heta siaredniaja adlehłaść, jakuju jany pralatajuć na praciahu hodu, atrymlivajecca, što za usio žyćcio ptuški pralatajuć kala 500.000 km» — havorycca ŭ prymierkavanaj da hetaj padziei zajavie Słužby hiealahičnaj raźviedki ZŠA ( US Geological Survey).

Atrymanyja vyniki pakazvajuć važnaść daśledavańniaŭ, zroblenych z dapamohaj spadarožnikavych pieradatčykaŭ dla achovy pryrody. Ale taksama vyśviečvajuć vialikuju zaležnaść pieralotnych ptušak ad pahroz, jakija isnujuć pa ŭsim śviecie.

«Mały hrycuk jość tolki adnym prykładam siarod sotniaŭ pieralotnych vidaŭ ptušak, jakija robiać takija značnyja vandroŭki štohod,» — kaža d‑r Viki Džoŭns (Dr Vicky Jones), supracoŭnik BirdLife pa hlabalnych šlachach mihracyj. «Pieralotnyja ptuški prypyniajucca ŭ niekalkich miescach, jakija utvarajuć łancuhi z tradycyjnych prypynkaŭ. Na ich jany mohuć uznavić svaje siły, adpačyć, padsiłkavacca, kab potym lacieć dalej. Ale ŭ hlabalnych maštabach takija miescy źnikajuć abo dehradujuć u takoj kolkaści, što jany parušajuć hety žyćciova nieabchodny łancuh i pryvodziać da źnižeńnia kolkaści mnohich pieralotnych vidaŭ. «

Tak, naprykład, małyja hrycuki pad čas svaich mihracyj mohuć być złučany z 20 krainami. Z 2006 hodu hrycuki ź pieradatčykami prypynialisia ŭ 11 krainach.

«I chacia kožnaja kraina niasie adkaznaść za mihracyju hetych ptušak nad svajoj terytoryjaj, tolki supraca na mižnarodnym uzroŭni zmoža zabiaśpiečyć sapraŭdnuju biaśpieku piarnatym vandroŭnikam,« — praciahvaje d‑r Džoŭns.

Hrycuk E7 atrymaŭ ciopłuju sustreču ŭ Novaj Zelandyi.

«Mas‑medyi z nahody prylotu Je7 dapamahli ludziam z usiaho Śvietu adčuć mahiju ptušynych mihracyj» — prakamentavaŭ padziei Michael Šabo (Michael Szabo) z arhanizacyi Forest & Bird (BirdLife u Novaj Zelandyi).

Daśledavańnie małych hrycukoŭ z dapamohaj spadarožnikavych pieradatčykaŭ jość častkaj prajektu «Mihracyi cichaakijanskich prybiarežnych ptušak» (Pacific Shorebird Migration Project); u jakim udzielničajuć navukoŭcy z PRBO Conservation Science, the US Geological Survey (USGS) Alaska Science Centre, Massey University i The University of Auckland (abodva apošnija — z Novaj Zelandyi). Pracy fundujuć USGS, the David and Lucile Packard Foundation i US Fish and Wildlife Service.

Birdlife.org.
Pierakłaŭ Dźmitry Vinčeŭski (APB).

Hladzi jašče:
Pieršy rekord małoha hrycuka

• 0
• 0
• 0
• 0
• 0
• 0
• 0
• 0