Prezident Rasii Uładzimir Pucin naŭprost zajaviŭ, što ličyć chimičnuju ataku 21 žniŭnia pad Damaskam pravakacyjaj siryjskich miaciežnikaŭ i tumanna paabiacaŭ padtrymać Siryju ŭ vypadku ŭdaru ZŠA pa joj.
«Ja zychodžu z taho, što ŭsio, što zdaryłasia z tak zvanym prymianieńniem chimičnaj zbroi — heta pravakacyja bajevikoŭ, jakija raźličvajuć na dapamohu z boku, na dapamohu tych krain, jakija ich pieršapačatkova padtrymlivali. U hetym — uvieś sens hetaj pravakacyi» , — skazaŭ Pucin u piatnicu pa zakančeńni samitu «Vialikaj dvaccatki» ŭ Sankt-Pieciarburhu.
Pucin skazaŭ, što jon «heta ŭžo kazaŭ», ale bolšaść zajaŭ, jakija jon i inšyja členy rasijskaha kiraŭnictva rabili na hetuju temu ŭ apošnija dni, byli ŭniklivyja: ich sens zvodziŭsia da taho, što vinavatyja ŭ chimičnaj ataki nie ŭstanoŭleny, a tamu i kazać pra nieabchodnaść vajennaha ŭdaru pa vojskach Bašara Asada, jak heta robiać ZŠA i Francyja, niepravamierna.
Pucin skazaŭ, što Rasija padtrymaje Siryju ŭ vypadku takoha ŭdaru — ale ź jaho słoŭ nie vynikała, što heta budzie padtrymka «suprać» napadnikaŭ.
«Ci budziem my dapamahać Siryi? Budziem. Jak i zaraz dapamahajem. My pastaŭlajem zbroju, supracoŭničajem u ekanamičnaj śfiery.
Spadziajusia, bolš budzie i supracoŭnictva humanitarnaha, u tym liku i ŭ vyhladzie pastavak humanitarnaj dapamohi pa akazańni padtrymki tym ludziam, cyvilnamu nasielnictvu, jakoje apynułasia ŭ vielmi ciažkaj situacyi siońnia», — skazaŭ Pucin.
Pucin paviedamiŭ, što jaho sustreča z prezidentam ZŠA Barakam Abamam, ab mahčymaści jakoj usie apošnija dni havaryli palityki, dypłamaty i žurnalisty, usio ž adbyłasia.
Praŭda, jana pradkazalna skončyłasia bieź jakich-niebudź zruchaŭ u siryjskim pytańni.
«My z prezidentam ZŠA sustrakalisia siońnia — praŭda, nie na nahach, a na inšym miescy my ź im znachodzilisia — siedziačy razmaŭlali» , — adkazaŭ Pucin na bryfinhu na pytańnie rasijskaha žurnalista, ci sustrakalisia jany «choć by na nahach» .
Ciapier čytajuć
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić4040
Kamientary