Bałharyja płanuje spraścić praces vydačy viz hramadzianam Biełarusi, Małdovy i Ukrainy
MBałharyja pracuje nad spraščeńniem pracesu vydačy viz dla hramadzian Biełarusi, Małdovy i Ukrainy. Pra heta, jak paviedamlaje vydańnie NewsBG.ru, zajaviŭ ministr zamiežnych spraŭ Bałharyi Kryścijan Vihienin, vystupajučy ŭ Narodnym schodzie.
Deputat Dzimča Michaleŭski zaznačyŭ, što sioleta čakajecca pavieličeńnie kolkaści turystaŭ z hetych krain na 40%.
Vihienin zajaviŭ, što jašče ŭ pačatku 2013 hoda była praviedziena techničnaja i kadravaja padrychtoŭka, a taksama karekcyja biudžetu MZS dla palapšeńnia pracy konsulskich słužbaŭ Bałharyi.
«U Biełarusi cikavaść da našaj krainy pavialičyłasia značna. Siońnia my adšukvajem u Minsku novy budynak dla konsulskaj słužby», — skazaŭ Vihienin.
Jon nahadaŭ, što ŭ pačatku 2012 hoda Bałharyja zaklučyła dahavor ź indyjskaj kampanijaj VFS Global ab stvareńni vizavych centraŭ, jakija pavinny spraścić atrymańnie viz u addalenych ad konsulstva rajonach. Pavodle jaho słoŭ, sioleta budzie praviedziena detalovaja pravierka vykanańnia dahavora.
Aprača taho, u Biełarusi, Małdovie i va Ukrainie praviedziena akredytacyja kampanij, jakija mohuć samastojna padavać dakumienty na atrymańnie bałharskich viz u konsulskuju słužbu. U kancy červienia kiraŭnik MZS taksama rasparadziŭsia pavialičyć kvoty na takija kampanii.
Vihienin pryznaŭ, što ŭ pačatku turystyčnaha siezona kvoty byli niečakana źmienšany. Jon zajaviŭ, što nie moža z parłamienckaj trybuny biez dokazaŭ abvinavacić kahości, ale padazraje, što ŭsio było zroblena dla taho, kab bolš dakumientaŭ prajšło cieraź vizavyja centry.
Kamientary