Partyja «Spraviadlivy śviet» patrabuje admieny dekreta Łukašenki № 9 jak antykanstytucyjnaha

Biełaruskaja partyja levych «Spraviadlivy śviet» patrabuje admieny dekreta № 9 jak antykanstytucyjnaha. Pra heta havorycca ŭ zajavie biuro CK partyi.

Jak ličyć «Spraviadlivy śviet», dakumient jaŭna supiarečyć normam Kanstytucyi. «Novy dekret robić zaležnaść rabotnika ad najmalnika jašče bolš rabskaj», — havorycca ŭ zajavie. Im ustanoŭlena, što kantrakty, zaklučanyja z rabotnikami da taho, jak dekret № 9 nabyŭ moc, «paśla zakančeńnia terminu ich dziejańnia pradaŭžajucca ŭ miežach maksimalnaha terminu ich dziejańnia, a paśla zakančeńnia maksimalnaha terminu ich dziejańnia zaklučajucca novyja kantrakty na pieryjad realizacyi inviestycyjnaha prajekta». Skasavańnie kantrakta ŭ pieryjad realizacyi inviestycyjnych prajektaŭ pa inicyjatyvie rabotnika zaraz mahčyma tolki sa zhody najmalnika.

«Takim čynam, dekretam zabaraniajecca samastojnaja admova rabotnika ad zaklučeńnia ci pradaŭžeńnia kantrakta i zvalnieńnie ŭ vypadku niazhody sa źmianieńniem istotnych umoŭ pracy ci paśla zakančeńnia terminu kantrakta»,

Jak nahadvajecca ŭ zajavie, ajčynnaje zakanadaŭstva harantuje kožnamu čałavieku prava na svabodny vybar pracy, na spraviadlivyja i spryjalnyja ŭmovy pracy. «Artykuł 41 Kanstytucyi Respubliki Biełaruś naŭprost zabaraniaje prymusovuju pracu, akramia pracy ci słužby, vyznačanaj pryhavoram suda ci ŭ adpaviednaści z zakonam ab nadzvyčajnym i vajennym stanoviščy», — nahadvaje partyja.

«Na padstavie vykładzienaha partyja „Spraviadlivy śviet“ kvalifikuje dekret № 9 jak čarhovuju antykanstytucyjnuju sprobu kirujučaha režymu vyrašyć prablemy, jakija ŭźnikli ŭ vyniku praviadzieńnia biazdarnaj ekanamičnaj palityki i prymityŭnaha dziaržaŭnaha kiravańnia, za košt rabotnikaŭ — šlacham hvałtoŭnaj pryviazki ich da nieefiektyŭnych i bieśpierśpiektyŭnych vytvorčaściaŭ, dzie vypłačvajucca nizkija zarpłaty i nie zabiaśpiečvajecca naležny ŭzrovień sacyjalnaj abarony. U hetych metach prezident i ŭrad iduć na hrubaje parušeńnie Kanstytucyi krainy i abaviazacielstvaŭ, pryniatych Respublikaj Biełaruś u miežach mižnarodnaha zakanadaŭstva», — havorycca ŭ dakumiencie.

Jak paviedamiŭ BiełaPAN namieśnik staršyni partyi Valeryj Uchnaloŭ, partyja nakiruje hetu zajavu ŭ Fiederacyju prafsajuzaŭ Biełarusi, «kab jany źviarnuli ŭvahu na hetu prablemu i zanialisia hetym pytańniem». Što ž datyčycca Kanstytucyjnaha suda, to Uchnaloŭ rastłumačyŭ, što palityčnyja partyi nie źjaŭlajucca tym subjektam, jakija mohuć inicyjavać razhlad dekreta na adpaviednaść Asnoŭnamu zakonu ŭ Kanstytucyjnym sudzie. «Adnak sam sud moža pa ŭłasnaj inicyjatyvie inicyjavać razhlad hetaha pytańnia. Tamu my źvierniemsia ŭ KS ź listom z prośbaj samastojna razhledzieć hety dekret na adpaviednaść Kanstytucyi», — zajaviŭ Uchnaloŭ.

• 0
• 0
• 0
• 0
• 0
• 0
• 0
• 0