У Расіі сёння некаторыя выйшлі пратэставаць супраць блакіровак інтэрнэту
Акцыі спрабавалі напярэдадні распіярыць у сацсетках, але ва ўмовах запалохвання грамадства масавых пратэстаў не здарылася.
У Расіі на сёння планаваліся акцыі пратэсту супраць блакіровак інтэрнэту. Пра колькасць удзельнікаў невядома. У Маскве і іншых расійскіх гарадах затрымалі 16 чалавек, піша «Агенцтва». Некаторых пасля адпусцілі.
Расійскія ўлады не дазволілі ніводнай акцыі супраць абмежаванняў інтэрнэту. А ў дзень забароненых пратэстаў у Маскве на Балотнай плошчы, Санкт-Пецярбургу на плошчы Леніна і ў цэнтры Екацярынбурга каля плошчы 1905 года і каля плошчы Працы было выстаўлена паліцэйскае ачапленне. У Мурманску жыхары сутыкнуліся з абмежаваннем інтэрнэту, а ў цэнтры горада былі заўважаны паліцэйскія аўтазакі і патрулі «Рускай абшчыны».
На відэа, якія публікаваліся, бачна, як на Балотнай плошчы ў Маскве гуляюць дзясяткі чалавек, сярод якіх шмат маладых людзей, але хто з іх пратэстоўцы, зразумець немагчыма.
У раёне плошчы было затрымана не менш за 12 чалавек, паведаміла «АВД-Інфа». Першым за здымку ўдзельнікаў няўзгодненай акцыі быў затрыманы 72‑гадовы праваабаронца і былы савецкі дысідэнт Аляксандр Падрабінек (праз некалькі гадзін яго адпусцілі з паліцыі). Адзін з затрыманых выйшаў на плошчу з плакатам «Не вайне».
Некалькі чалавек затрымалі ў іншых гарадах.
У дні перад акцыямі сілавікі затрымлівалі 10 актывістаў.
Апошні раз 12 чалавек на пратэснай акцыі ў Маскве (тады пратэставалі сваячкі мабілізаваных) былі затрыманы ў верасні 2024 года.
Расійскі паліттэхнолаг Дзмітрый Кісіеў, які першапачаткова анансаваў мітынгі супраць блакіровак на 29 сакавіка, паведаміў пра планы падаць заяўкі на новыя акцыі на 12 красавіка.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары