Жыхар Мазырскага раёна атрымаў 10 гадоў за разбэшчванне школьніц

Паводле следства, у ліпені 2023 года мужчына таемна зарэгістраваў на нумар тэлефона маці фэйкавую старонку ў сацыяльнай сетцы «ВКонтакте».

Пад выдуманым мужчынскім імем ён уступаў у перапіску са школьніцамі, выдаючы сябе за маладога хлопца. Ён расказваў дзецям пра парнаграфію, розныя формы сэксуальных адносін, прасіў даслаць непрыстойныя відэа– і фотаздымкі свайго цела, настойліва прапаноўваў асабістыя сустрэчы для інтымных забаў, у тым ліку за матэрыяльную ўзнагароду.

Дзве школьніцы паддаліся цікаўнасці і пагадзіліся пагутарыць з «хлопцам» на вуліцы ў прысутнасці сваіх сябровак. У адным выпадку, убачыўшы на сустрэчы дарослага мужчыну, дзяўчынка з сяброўкай паспяшаліся дадому, і ў далейшым яна спыніла з ім зносіны. У другім выпадку школьніца працягнула перапіску.

Устаноўлена 45 эпізодаў злачыннай дзейнасці фігуранта, учыненых на працягу паўтара года.

Пацярпелымі прызнаны 35 чалавек ва ўзросце 12—15 гадоў, з якіх большая частка пражывае на тэрыторыі Гомельскай вобласці, некалькі асоб — у іншых абласцях.

Сярод пацярпелых — 15‑гадовы юнак, які дзеля забавы меў зносіны ў сацыяльнай сетцы з фэйкавай старонкі пад выглядам дзяўчынкі.

Абвінавачаны адмовіўся ад дачы паказанняў, віну не прызнаў.

На падставе сабраных па справе доказаў жыхару Мазырскага раёна прад’яўлена абвінавачанне па некалькіх артыкулах Крымінальнага кодэкса Рэспублікі Беларусь:

ч. 2 арт. 169 (распусныя дзеянні, учыненыя асобай, якая дасягнула васемнаццацігадовага ўзросту, у дачыненні да асобы, якая заведама не дасягнула шаснаццацігадовага ўзросту, у дачыненні да заведама малалетняй);

ч. 2 арт. 343 (распаўсюджванне асобе, якая заведама не дасягнула шаснаццацігадовага ўзросту, парнаграфічных матэрыялаў, учыненае асобай, якая дасягнула васемнаццацігадовага ўзросту);

ч. 3 арт. 343‑1 (выкарыстанне заведама малалетняга для вырабу парнаграфічных матэрыялаў з яго выявай, учыненае асобай, якая раней учыніла злачынства, прадугледжанае арт. 343 КК Рэспублікі Беларусь, з выкарыстаннем глабальнай камп’ютарнай сеткі Інтэрнэт);

ч. 3 арт. 172 (уцягванне асобай, якая дасягнула васемнаццацігадовага ўзросту, заведама непаўналетняга ва ўчыненне асабліва цяжкага злачынства шляхам абяцанняў, падману або іншым спосабам).

Судом жыхару Мазырскага раёна прызначана пакаранне ў выглядзе пазбаўлення волі на тэрмін 10 гадоў з адбываннем у папраўчай калоніі ва ўмовах узмоцненага рэжыму. 

• 1
• 0
• 1
• 0
• 0
• 0
• 0
• 0