Эпоха непрактычных мікрасумачак і залішне строгіх партфеляў адыходзіць у цень. На галоўныя пазіцыі ў гардэробе вяртаецца аксесуар, які ідэальна спалучае ў сабе расслабленую элегантнасць і практычнасць. Стылісты ўпэўненыя: гэты трэнд ператвараецца ў новую разумную класіку, у якую варта інвеставаць проста зараз.
Як піша Vogue, імпульсам для маштабнага вяртання сумкі мяккай формы (slouchy bag) стаў дэбютны паказ вясна-2025 ад Chloé. Менавіта гэты модны дом рэабілітаваў эстэтыку «боха», прэзентаваўшы мадэль Bracelet («Бранзалет») — мяккую скураную сумку з залатой фурнітурай, натхнёную аксесуарамі 1960-х, якія любілі хіпі ў эпоху контркультуры.
Гэты тып сумак у свеце моды традыцыйна называюць «хоба» (hobo bag). Каб зразумець сутнасць гэтага дызайну, варта зірнуць на гісторыю тэрміна. Ён адсылае да амерыканскіх вандроўных рабочых пачатку мінулага стагоддзя. Іх галоўным атрыбутам быў вузел з рэчамі на палцы, які пад цяжарам правісаў характэрным паўмесяцам. Менавіта гэтую мяккую свабодную форму, якая змяняецца ў залежнасці ад напаўнення, і запазычыла высокая мода.
Сёння, праўда, індустрыя спрабуе правесці своеасаблівы «рэбрэндынг»: стылісты ўсё часцей прапануюць называць такія мадэлі больш нейтральна — «слінг» (сумка на рамяні) або «паўмесяц» (crescent). Але як ні назаві, сутнасць нязменная: адсутнасць жорсткага каркаса і абсалютная пластычнасць.
На паказах вясна-2026 года многія вядомыя брэнды — ад Bottega Veneta і Dior да Hermès і Fendi — прадставілі ўласныя версіі такіх сумак. Дызайнеры паказалі разнастайныя варыяцыі: з замшы насычаных карычневых адценняў, з анімалістычнымі прынтамі або ў спакойнай нейтральнай гаме.
Стылісты тлумачаць папулярнасць стылю «хоба» вельмі празаічна: перамагла функцыянальнасць. Звычайна такія сумкі маюць шырокі верх і маланку, таму з іх зручна даставаць рэчы, а ўнутр лёгка змяшчаецца ўсё неабходнае на дзень. У адрозненне ад строгіх офісных партфеляў, мяккая форма надзвычай эрганамічная. Яна паўтарае выгібы цела, а не тырчыць, як класічныя каркасныя «дзелавыя мадэлі».
Нягледзячы на відавочную сувязь з модай пачатку 2000‑х (калі падобныя сумкі насілі, напрыклад, Сіена Мілер і Кейт Мос), эксперты лічаць, што гэта не чарговая хваля настальгіі.
Лаканічны дызайн дазваляе разглядаць такую сумку не як сезонную навінку, а як рэч, якая застанецца ў гардэробе на доўгі час.
Ёсць падобныя мадэлі і ў беларускіх крамах.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»37
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары