Міністэрства адукацыі вызначыла тэрміны падачы дакументаў, правядзення ўступных іспытаў і залічэння абітурыентаў у ВНУ ў 2026 годзе.
Асноўны прыём дакументаў на бюджэт стартуе 12 ліпеня. У большасці выпадкаў ён будзе доўжыцца да 17 ліпеня, аднак для шэрагу кірункаў і формаў навучання ўстаноўлены асобныя тэрміны.
Так, для вочнай формы па сельскагаспадарчых спецыяльнасцях, а таксама для ўсіх спецыяльнасцяў у сілавых і вайсковых ВНУ, уключаючы вайсковыя факультэты, дакументы будуць прымаць з 12 да 19 ліпеня. Завочнікі сельскагаспадарчага профілю падаюць дакументы значна пазней — з 15 лістапада да 5 снежня.
На платнае навучанне тэрміны агулам супадаюць з бюджэтнымі. Пры гэтым для абітурыентаў, якія паступаюць без уступных выпрабаванняў, прыём дакументаў падоўжаны: у большасці ВНУ — да 1 жніўня, а па сельскагаспадарчых спецыяльнасцях вочнай формы — да 2 жніўня. Ва Універсітэце грамадзянскай абароны МНС дакументы ў такіх абітурыентаў будуць прымаць да 26 ліпеня.
Экзамены і іншыя выпрабаванні ў большасці ВНУ пройдуць з 18 да 25 ліпеня.
Выключэнні зноў тычацца сілавых і аграрных кірункаў:
- ва Універсітэце грамадзянскай абароны МНС— 18‑20 ліпеня;
- на Вайсковым факультэце Гродзенскага дзяржуніверсітэта — 20‑21 ліпеня;
- па сельскагаспадарчых спецыяльнасцях вочнай формы — 20‑25 ліпеня;
- у завочнікаў аграрных ВНУ— 6‑15 снежня.
Першыя загады аб залічэнні будуць выдадзеныя ўжо 2 ліпеня — для пераможцаў універсітэцкіх алімпіяд і выпускнікоў праграмы «Школа кіравання» Акадэміі кіравання.
Асноўнае залічэнне на бюджэт закончыцца:
- да 22 ліпеня — у вайсковых і ВНУ пры МНС;
- да 29 ліпеня — у Акадэміі МУС і Магілёўскім інстытуце МУС;
- да 27 ліпеня — у астатніх ВНУ;
- да 20 снежня — для завочнай формы ў аграрных універсітэтах.
На платнае навучанне абітурыентаў залічаць да 3 жніўня, а завочнікаў сельскагаспадарчага профілю — да 20 снежня.
Каментары