Літва не была гатовая да адкрыцця тайваньскага прадстаўніцтва, яно стала памылкай — спікер Сейма
«Неабходна нармалізаваць адносіны з Кітаем і ўмацоўваць эканамічныя сувязі з Тайванем».
Спікер Сейма Літвы Юозас Олекас кажа, што Літва належным чынам не падрыхтавалася да адкрыцця тайваньскага прадстаўніцтва ў 2021 годзе, і таму гэта была памылка. Паводле слоў кіраўніка парламента, кіруючая кааліцыя, заяўляючы пра гэта, імкнецца не да закрыцця прадстаўніцтва, а да паляпшэння супрацоўніцтва з Тайбэем, піша LRT.
«Мы не падрыхтаваліся да працы з Тайванем да прыняцця гэтага рашэння [аб адкрыцці прадстаўніцтва], каб атрымаць дастатковую эканамічную аддачу ад Тайваня. Па-другое, мы не працавалі належным чынам з партнёрамі і саюзнікамі, каб забяспечыць больш шырокае прыняцце рашэння, мы засталіся такімі адзінымі. (…) Мне неаднаразова даводзілася камунікаваць з прадстаўнікамі іншых еўрапейскіх краін, яны па-сяброўску падтрымліваюць, але не ідуць за гэтым прыкладам», — сказаў Олекас у праграме «Форум LRT» у панядзелак.
«Мы кажам, што прызнаём, што ў той час прымаць такое рашэнне з такой падрыхтоўкай было памылкай, патрабавалася значна большая падтрымка з боку саюзнікаў», — адзначыў спікер Сейма.
Паводле яго слоў, кіроўная кааліцыя ні разу не заяўляла пра неабходнасць закрыцця тайваньскага прадстаўніцтва і не імкнецца да гэтага.
«Ці трэба заўсёды маўчаць, зрабіўшы такі крок? Гэта сказана для таго, каб мы маглі ўмацоўваць цяперашнія сувязі і з тайваньцамі», — сказаў Олекас.
«Сказаць, як ёсць, не грэх. (…) Тое, што цяпер робіць урад, тое, што робіць Міністэрства замежных спраў, мне здаецца, гэта неабходныя рэчы, якія раней былі недастаткова зробленыя. (…) Неабходна нармалізаваць адносіны з Кітаем і ўмацоўваць эканамічныя сувязі з Тайванем», — дадаў ён.
Міністр замежных спраў Кястуціс Будрыс сцвярджаў, што мэтай Літвы ў адносінах з Тайванем з’яўляецца «добры план эканамічнага супрацоўніцтва».
«Я працую над гэтым з Тайванем. (…) Гэта нармальнае двухбаковае супрацоўніцтва, такое, якое мы хочам у эканоміцы, культуры і іншых галінах. У галіне эканомікі мы хочам дасягнуць пэўных паказчыкаў і працуем [над гэтым]», — сказаў кіраўнік літоўскай дыпламатыі.
Паводле слоў Будрыса, «няма такога пытання на парадку дня», як закрыццё тайваньскага прадстаўніцтва.
* * *
Калі вы жывяце ў Літве, то можаце за хвіліну падтрымаць «Нашу Ніву» часткай вашага падаходнага падатку. Гэта не будзе каштаваць вам ані цэнта.
Вы проста перанакіруеце 1,2% ад ужо сплачанага вамі падатку пры падачы штогадовай дэкларацыі.
Вось падрабязная інструкцыя, як гэта зрабіць, калі вы працуеце ў Літве.
Цяпер чытаюць
Мігранцкі крызіс, арганізаваны Лукашэнкам, — усё? Вось што паказваюць лічбы9
Каментары