У парку горада Вішнёвае пад Кіевам пры ўдзеле прадстаўнікоў Галоўнага ўпраўлення разведкі Мінабароны Украіны адбылося адкрыццё помніка легендарнаму беспілотніку-бамбардзіроўшчыку «Баба Яга», піша РБК-Украіна.
Скульптура прысвечана легендарнаму цяжкаму дрону-бамбардзіроўшчыку (БПЛА Heavy Shot), другая назва якога — прамая адсылка да таго, як украінскую зброю ўспрымае вораг, — «Баба Яга». Гэтыя дроны сталі сапраўдным жахам для расійскіх войскаў.
«Мы ўпэўнены: калі дрон захавае хоць адно жыццё абаронцы на перадавой, гэта значыць, што мы ўжо зрабілі нешта не дарэмна, і гэта ўжо будзе дасягненнем. Гэта не апошняя дапамога — мы будзем і далей дапамагаць Узброеным сілам і рабіць усё, што ад нас залежыць. І, вядома, каб вайна скончылася як мага хутчэй нашай перамогай», — сказаў гарадскі галава Ілля Дзікаў.
Ініцыяваў стварэнне незвычайнага помніка, які сімвалізуе тэхналагічную перавагу Украіны на фронце, валанцёр, мецэнат і блогер Ігар Амеляновіч.
«Насамрэч ворагі так называюць любы вялікі дрон такога памеру. Яны заўсёды крычалі: «Баба Яга ляціць», і заўсёды хаваліся ў сховішчы, бо гэта сапраўды наводзіла на іх жах. Яны спрабуюць паўтарыць гэтую тэхналогію, але ў іх не атрымліваецца», — кажа валанцёр
БПЛА Heavy Shot здольны дастаўляць 30 кг «падарункаў» ворагу або неабходны правіянт сваім на адлегласць да 25 км. Ён створаны для рэальнай вайны, дзе пануюць РЭБ, абстрэлы і непагадзь.
Галоўныя перавагі — імгненная адаптацыя пад любы тып боепрыпасу або абсталявання: адзін дрон — дзясяткі сцэнарыяў выкарыстання. Таксама ён мае ўзмоцненую абарону электронікі і корпуса, што дазваляе вяртацца з місій нават пасля агнявога кантакту.
«Мы ўдзячныя — для нас гэта гонар, што менавіта гэты борт будзе стаяць тут, і людзі будуць яго бачыць. Менавіта дзякуючы такой тэхніцы нашы Сілы абароны могуць штодня змагацца з ворагам. Гэта прататып борта 2023 года, ужо непрацоўны, тут толькі корпус. На той час гэта быў адзін з найбуйнейшых бортаў у Сілах абароны, які нёс найбольшую вагу. Менавіта яго мы сёння вырашылі ўвекавечыць тут», — адзначае прадстаўніца вытворцы Heavy Shot Кацярына.
Каментары