Былога фігуранта справы «Белага легіёна» зноў арыштавалі па крымінальнай справе
Сяргей Стрыбульскі, былы ўдзельнік так званай «справы Белага легіёну», сфабрыканавай уладамі ў 2017 годзе, зноў затрыманы паводле крымінальнага артыкула. Пра гэта выданню «Позірк» паведаміла інфармаваная крыніца.
Паводле слоў крыніцы «Позірка», Сяргея Стрыбульскага затрымалі яшчэ 14 лістапада, пасля чаго ён адбыў два адміністрацыйныя арышты. А ўжо з 12 снежня яго ўтрымліваюць у межах крымінальнай справы. Цяпер Стрыбульскі знаходзіцца ў магілёўскай турме № 4, частка якой выкарыстоўваецца як следчы ізалятар.
Як адзначае крыніца, супраць Сяргея Стрыбульскага выстаўленае абвінавачанне паводле ч. 1 арт. 361⁴ Крымінальнага кодэкса — за нібыта ўцягванне іншых асоб у экстрэмісцкую дзейнасць і садзейнічанне ёй.
Упершыню Стрыбульскага затрымлівалі ў 2017 годзе ў межах гучнай справы «Белага легіёну». Тады ён правёў за кратамі 99 дзён, але справу закрылі праз адсутнасць складу злачынства. Пазней, восенню 2021 года, яго зноў затрымлівалі, канфіскаваўшы тэхніку і так званую «пратэсную сімволіку».
У 2022 годзе, паводле звестак праваабарончага цэнтра «Вясна», Стрыбульскага затрымалі 23 сакавіка — напярэдадні Дня Волі. На наступны дзень яго арыштавалі на 15 дзён. Пасля вызвалення ён расказваў знаёмым, што падчас затрымання яго збівалі і выкарыстоўвалі электраток.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары