У Мінску сувора пакаралі мужчыну, які прымушаў іншых людзей жабраваць на вуліцах. Ён «зарабіў» амаль 10 тысяч рублёў
Суд Заводскага раёна Мінска вынес прысуд мужчыну, які некалькі гадоў прымушаў двух людзей жабраваць на вуліцах горада.
42‑гадовы мужчына з лютага 2021‑га да траўня 2024 года выкарыстоўваў кепскае становішча двух чалавек, у якіх не было жытла і сродкаў да існавання. Ён забраў іх пашпарты, тым самым пазбавіўшы магчымасці сысці, і штодня прымушаў выходзіць «на працу» — прасіць міласціну.
На ўказанні абвінавачанага яго ахвяры павінны былі сядзець у інвалідных калясках, дэманструючы бездапаможнасць. Ім забаранялася ўставаць, драмаць, апускаць галаву, а за парушэнне правілаў сыпаліся пагрозы і пабоі.
Суд устанавіў, што мужчына рэгулярна біў пацярпелых кійком, рукамі, нагамі, абліваў халоднай вадой і выганяў на вуліцу без адзення ў халоднае надвор’е. Усе грошы, якія мінакі давалі ахвярам, ён забіраў сабе. За тры гады такой «дзейнасці» ён атрымаў не менш за 9765 рублёў.
На судзе абвінавачаны віну не прызнаў.
Прысудам суда мужчына прызнаны вінаватым у іншай форме эксплуатацыі чалавека (п. 2 ч. 2 арт. 181−1 КК). Яго асудзілі на восем з паловай гадоў і далі 21 тысячу рублёў штрафу.
З улікам папярэдняга прысуду суда Асіповіцкага раёна канчатковы тэрмін склаў 8 гадоў і 10 месяцаў калоніі ўзмоцненага рэжыму, а таксама асуджанаму забаронена кіраваць транспартам цягам пяці гадоў. Акрамя таго, суд пастанавіў спагнаць з мужчыны незаконна атрыманы даход — 9765 рублёў.
У гарах Кыргызстана з дрона адшукалі целы зніклых беларускіх альпіністаў8
Каментары
Атрымліваецца, што прыйшоў яшчэ большы бандыт і забраў сабе.
Такая справядлівасць.