У час рэстаўрацыі ў палацы Валовічаў у Свяцку (Гродзенскі раён) пад некалькімі слаямі пазнейшай тынкоўкі рэстаўратары выявілі галерэю партрэтаў рымскіх імператараў, выкананую ў XVIII стагоддзі майстрамі еўрапейскага ўзроўню.
Паводле слоў дырэктара дызайн-студыі «Пальмета» Ігара Ганяева, знойдзены жывапіс у зале рымскіх імператараў паказвае выдатную прапрацоўку дробных дэталяў, такіх як блікі, вочы, вусны, бароды і лаўровыя вянкі на галовах антычных кіраўнікоў, што сведчыць пра высокую якасць і прафесіяналізм аўтара.
«Гэта гістарычны жывапіс у тэхніцы грызайль з найдрабнейшай прапрацоўкай дэталяў. Гэта аўтарскі жывапіс найвышэйшага еўрапейскага і сусветнага ўзроўню — без сумненняў і без перабольшанняў», — адзначыў Ганяеў.
Партрэты больш за сто гадоў заставаліся схаванымі пад пластамі грунту, фарбы і пабелак, пакуль іх не знайшлі падчас рэстаўрацыйных работ, якія працягваюцца ў палацы.
«Мы адкрылі сапраўды вялікія творы. Гэта не толькі для Гродзеншчыны, але і для ўсёй краіны вельмі значная падзея», — падкрэсліў спецыяліст.
Акрамя залы рымскіх імператараў, працы таксама ідуць у зале №6, пейзажным зале і на параднай лесвіцы. Як паведамляў намеснік кіраўніка Гродзенскай вобласці Андрэй Жук, ва ўсіх гэтых памяшканнях былі знойдзены прыклады жывапісу XVIII стагоддзя, выкананыя тэмпернай фарбай па тынку.
«Наша Нiва» — бастыён беларушчыны
ПАДТРЫМАЦЬ
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары