Акупацыйныя ўлады Крыма зрэзалі ліміт адпускання бензіну з 30 літраў да 20 літраў у адны рукі. Акупацыйны кіраўнік паўвострава Сяргей Аксёнаў канстатаваў, што меры, прынятыя да гэтага часу, не дазволілі «цалкам выраўнаваць сітуацыю з наяўнасцю неабходнага аб'ёму аўтамабільнага паліва на АЗС Крыма».
«Сітуацыя аб’ектыўная. Вы ж ведаеце, такая сітуацыя не толькі ў адным рэгіёне. Папрашу набрацца цярпення, на жаль, вастрыня ў нас толькі павышаецца. Вы ж ведаеце, гэта аб’ектыўныя прычыны», — заклікаў крымчан кіраўнік акупацыйнай адміністрацыі.
Сацыяльная сфера і грамадскі транспарт будуць забяспечвацца бензінам у поўнай меры, а «інфармацыя пра арганізацыю стабільных паставак» будзе 3 кастрычніка, абяцае Аксёнаў.
1 кастрычніка выданне РБК паведаміла, што ў Расіі выбылі са строю амаль 40% магутнасцяў нафтаперапрацоўкі, большая частка — праз удары ўкраінскіх беспілотнікаў. Цяпер расійскі ўрад рыхтуецца адмяняць імпартныя пошліны на бензін і акцыз на паліўны этанол, а таксама дазваляць шкодныя прысадкі для павышэння актанавага ліку.
Каментары