Эстонцаў заклікалі ўлічваць рызыкі падчас паездак у Беларусь. Улада папярэдзіла пра магчымыя апытанні і затрыманні, а таксама пра складанасці з атрыманнем консульскай падтрымкі, паведамляе ERR.
Міністэрства замежных спраў Эстоніі звярнулася да сваіх грамадзян з перасцярогай адносна паездак у Беларусь. Падставай сталі шматлікія выпадкі, калі эстонцаў спынялі на мяжы, апытвалі або затрымлівалі ўнутры краіны.
«Было дастаткова шмат выпадкаў і на мяжы, і ўнутры Беларусі, калі з нашымі грамадзянамі ўступалі ў кантакт, іх апытвалі або затрымлівалі, як і грамадзян іншых краін ЕС. Падчас знаходжання там сітуацыя можа стаць надзвычай непрыемнай для нашых грамадзян», — сказала прадстаўнік МЗС Эстоніі Ангела Саар-Рааман.
Паводле слоў прадстаўніцы МЗС, у выпадку ўзнікнення праблем у Беларусі атрыманне дапамогі з боку эстонскіх дыпламатаў ускладненае.
«З 20 мая 2024 года ў эстонскай дыпмісіі ў Беларусі няма дыпламата, і беларускага дыпламата ў Эстоніі таксама няма. У нас таксама няма ў Беларусі консула. Падчас паездкі ў Беларусь варта ўлічваць, што прадастаўленне консульскай дапамогі можа заняць значна больш часу, чым звычайна, або ўвогуле быць немагчымым», — растлумачыла Саар-Рааман.
Каментары