Сталіца Ірана можа быць перанесеная з-за катастрафічнага дэфіцыту вады
Іран сутыкнуўся з беспрэцэдэнтным водным крызісам, які ўжо паўплываў на жыццё мільёнаў людзей і працу дзяржаўных устаноў. У адказ на пагаршэнне сітуацыі прэзідэнт краіны Масуд Пезешкіян не выключыў магчымасці пераносу сталіцы з Тэгерана.
Як паведамляе Spigel.de, прэзідэнт Ірана назваў сітуацыю з забеспячэннем вадою сталіцы «сур'ёзнай» і заявіў, што краіне давядзецца разглядаць нават перанос адміністрацыйнага цэнтра як варыянт выратавання.
Па словах Пезешкіяна, «у Тэгерана сапраўды скончылася вада». Зараз у горадзе жывуць каля 15 мільёнаў чалавек, і крызіс ужо паўплываў на працу дзяржаўных структур і прамысловых прадпрыемстваў.
Як піша The Guardian, на гэтым тыдні Іран перажыў самыя гарачыя дні з пачатку года — і, магчыма, самыя высокія тэмпературы ў свеце: у асобных рэгіёнах краіны слупок тэрмометра ўздымаўся ад +50,3°С да +52,8°С.
Пры гэтым за апошнія пяць гадоў у краіне назіраецца рэкордна нізкі ўзровень ападкаў, вадасховішчы амаль высахлі, электрастанцыі працуюць з перабоямі, а забеспячэнне электраэнергіяй часта парушаецца.
Паводле дзяржаўнага інфармацыйнага агенцтва IRNA, адно з найбуйнейшых іранскіх вадасховішчаў можа цалкам высахнуць на працягу чатырох тыдняў.
На сямі буйных плацінах узровень вады апусціўся ніжэй за 10 %, а ў правінцыях Хармазган і Фарс некаторыя плаціны ўжо зусім без вады. Кліматычныя эксперты адзначаюць, што каля 80 % вадасховішчаў практычна пустыя. У найбліжэйшыя два месяцы нармальнае водазабеспячэнне малаверагоднае — пакуль дажджы восенню не палепшаць сітуацыю.
У адказ на катастрофу ўрад закрыў усе школы і дзяржаўныя ўстановы як мінімум да суботы. Многія фабрыкі прыпынілі працу, што прывяло да зніжэння вытворчасці і пагрозы масавых звальненняў. Афіцыйная прадстаўніца ўрада Фатэмэ Махаджэрані назвала сітуацыю «стыхійным бедствам».
Дзясяткі тысяч жыхароў сталіцы пачалі масава пакідаць горад і пераязджаць у паўночныя правінцыі, у тым ліку да Каспійскага мора, дзе праблем з водазабеспячэннем пакуль няма. На фоне крызісу ўсё гучней чутно крытыку на адрас ісламскага рэжыму і мясцовых уладаў, якіх абвінавачваюць у неэфектыўным кіраванні і няздольнасці адказаць на выклікі, звязаныя з кліматычнымі зменамі.
Каментары