Футбольны клуб «Лакаматыў» з Плоўдзіва звольніў славутага ў мінулым беларускага футбаліста Сяргея Алейнікава з пасады спартыўнага дырэктара, піша «Трыбуна».
Сяргей Алейнікаў далучыўся да «Лакаматыва» ў канцы мінулага года. Паведамлялася, што кантракт з ім заключаны на два гады. Пра прычыны скасавання супрацоўніцтва ўсяго толькі трохі больш чым праз паўгода афіцыйна пакуль не паведамляецца.
За гэты самы «Лакаматыў» з Плоўдзіва, дарэчы, выступаў беларускі паўабаронца Уладзімір Мядзведзь, пра пераход якога ў сафійскую «Славію» стала вядома ў той жа самы дзень. Пакуль цяжка сказаць, ці гэта проста супадзенне.
63-гадовы Сяргей Алейнікаў, бадай, найлепшы беларускі футбаліст XX стагоддзя. Ён нават быў афіцыйна прызнаны такім у 2003 годзе, калі адзначалася 50-годдзе УЕФА і кожная еўрапейская краіна вызначала сваіх найлепшых футбалістаў за перыяд з 1954 па 2003 гады.
Алейнікаў гуляў у залатым складзе мінскага «Дынама», якое ў 1982 годзе стала пераможцам чэмпіяната СССР, правёў 73 гульні за зборную СССР, разам з ёй у 1988 годзе заваяваўшы срэбраныя медалі чэмпіяната Еўропы. Акрамя таго, ён змог на заключным этапе кар'еры гульца крыху пагуляць за знакаміты італьянскі «Ювентус».
Пасля заканчэння кар'еры Алейнікаў стаў трэнерам, але тут у яго ўсё склалася горш, чым у гульца. У асноўным ён трэніраваў італьянскія клубы, але з ніжэйшых дывізіёнаў, прытым асаблівых поспехаў з імі не дабіваўся.
Цяпер чытаюць
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м2
Бабарыка заявіў пра вяртанне ў палітыку і назваў вінаватага ў тым, што змены не адбыліся ў 2020-м
Дзеці злізвалі з бруднай падлогі пралітае малако. Якой пабачыў замежнік Беларусь, спустошаную расійскімі і шведскімі войскамі ў час Паўночнай вайны1111
Каментары