Бацькоў выклікаюць у школы, каб адгаварыць вучыць дзяцей за мяжой
У Беларусі зноў актывізавалі барацьбу з паступленнем абітурыентаў за мяжу. Бацькоў некаторых вучняў выклікаюць на размову з настаўнікамі і адміністрацыяй.
Пыталіся, што не падабаецца ў Беларусі
«Ідэалагічная апрацоўка ідзе ад самага пачатку навучальнага года. У школу рэгулярна прыходзяць ідэолагі, якія распавядаюць дзецям, як выдатна жыць у Беларусі, якія вялікія перспектывы іх тут чакаюць.
Паралельна з гэтым расказваюць, як дрэнна жывецца беларусам у Еўропе, як там яны нікому не будуць патрэбныя», — распавядае мама адзінаццацікласніка.
Маці выпускніка кажа, што ў лютым у выпускных класах праводзілі анкетаванне, дзе былі пытанні пра тое, куды вучні збіраюцца паступаць.
«Здаецца, гэта нармальная практыка, бо ў старэйшага сына таксама былі падобныя апытанні, калі ён вучыўся ў 11-м класе. Але пяць гадоў таму нікога асабліва не турбаваў той факт, што школьнік збіраецца паступаць за мяжу.
Цяпер жа бацькоў, чые дзеці напісалі, што збіраюцца вучыцца за мяжой, выклікаюць у школу», — прызнаецца жанчына.
Адміністрацыя спрабуе пераканаць бацькоў, каб іх дзеці заставаліся ў Беларусі, а не выязджалі на Захад.
«Пачалі расказваць, як беларуская дзяржава клапоціцца пра моладзь, пра перспектывы, якія іх тут чакаюць. Пыталіся, што нам не падабаецца ў Беларусі, калі мы збіраемся адпраўляць дзяцей за мяжу», — згадвае жанчына.
Суразмоўца адзначае, што прынамсі дырэктарка школы падчас размовы паводзіла сябе так, быццам верыць у тое, што кажа.
«З класным кіраўніком было размаўляць прасцей, бо яна шчыра сказала, што вымушана ўсё гэта рабіць праз ціск з боку адміністрацыі, паколькі высокі працэнт паступленняў за мяжу — гэта дрэнна для школы. А вось дырэктарка вельмі падобная да ідэйнай лукашысткі», — прызнаецца суразмоўца.
«Правільны» адказ у анкеце не гарантуе спакою
Яшчэ адных бацькоў запрасілі на размову ў школу, нават нягледзячы на тое, што іх дачка ў анкеце не пазначала, што збіраецца з’язджаць.
«Мы яшчэ з мінулага года ведалі ад знаёмых, што на пытанні ў той анкеце трэба адказваць «правільна», таму падрыхтавалі дачку, каб яна напісала, што будзе паступаць у беларускую ВНУ.
Тым не менш, нас усё адно выклікалі, але спасылаліся не на даныя з анкеты, а на чуткі, што дачка нібыта плануе паступаць у Польшчу.
Натуральна, што сярод сяброў дзеці не будуць хлусіць пра тое, дзе хочуць вучыцца, таму для настаўнікаў няма вялікай праблемы даведацца пра намеры вучняў.
Але мы стаялі на сваім, што ў анкеце інфармацыя праўдзівая, што дачка застанецца ў Беларусі і ў ніякую Польшчу не збіраецца», — прызнаецца маці выпускніцы.
Яна была не адзінай у класе, хто апынуўся ў падобнай сітуацыі. Жанчына кажа, што многія бацькі дамаўляюцца з дзецьмі, каб тыя менш распаўсюджваліся пра свае планы з’ехаць вучыцца за мяжу.
«У анкетах толькі некалькі чалавек з класа адказалі, што плануюць працягваць вучобу ў іншай краіне. Але калі паразмаўляць з іншымі бацькамі, то вынікае, што не менш за палову вучняў маюць такі намер. Большасць выбірае Польшчу, а на другім месцы па папулярнасці ідзе Расія», — кажа маці будучай выпускніцы.
Учора Мінск зноў затапіла. Чаму сталіца не гатовая да дажджоў?4
Каментары