Украіна павінна паслаць Трампа за расійскім вайсковым караблём — крыніца The Times у Мінабароны Брытаніі
Апошнія крокі Злучаных Штатаў выклікалі недавер, а часам і гнеў у Еўропе.
Як піша The Times, пакуль чыноўнікі НАТА і ЕС спрабавалі асэнсаваць змены ў прыярытэтах амерыканскай палітыкі пасля заявы новага кіраўніка Пентагона Піта Хегсэта пра тое, што «суровыя стратэгічныя рэаліі не дазваляюць Злучаным Штатам Амерыкі сканцэнтравацца ў першую чаргу на бяспецы Еўропы», ацэнцы планаў вяртання Украіны да межаў 2014 года як «нерэалістычных», а перспектыў яе далучэння да НАТА як малаімаверных, стала вядома, што Трамп правёў перамовы з Пуціным.
Размова з Расіяй да кансультацый з Украінай стала істотным адыходам ад палітыкі ягонага папярэдніка, Джо Байдэна, які настойваў на прынцыпе «нічога пра Украіну без Украіны».
Апошняя навіна выклікала сапраўдны шок у чыноўнікаў НАТА, якія тэрмінова сабраліся ў кулуарах для абмеркавання магчымых наступстваў і выпрацоўкі адпаведнай рэакцыі.
Па словах крыніцы ва УСУ, Украіна была ў шоку. «Сітуацыя нядобрая. Перамовы пра Украіну без Украіны і пра еўрапейскую бяспеку без Еўропы», — цытуе яе словы выданне.
Занепакоенасць выказвалі і чыноўнікі ў брытанскім Міністэрстве замежных спраў. «Здыміце гарантыі бяспекі і перспектыву сяброўства ў НАТА — і Пуцін, здаецца, гатовы да перамоў», — пракаментавала The Times адна з крыніц ва ўрадзе.
У Міністэрстве абароны Вялікабрытаніі, што знаходзіцца на супрацьлеглым баку вуліцы, панавала разгубленасць.
«Некаторыя з нас казалі: украінцы тры гады ваявалі, гублялі сваіх сыноў і дачок не для таго, каб іх адхілілі ад абмеркавання іх будучыні. На іх месцы я б адказаў Трампу гэтак жа, як абаронцы вострава Змяіны», — заявіў суразмоўца выдання, маючы на ўвазе вядомы адказ украінскіх памежнікаў расійскаму вайсковаму караблю ў першыя дні вайны.
Міністр абароны Вялікабрытаніі Джон Хілі і брытанская дэлегацыя ў Брусэлі працавалі да позняй ночы ў рэзідэнцыі Вялікабрытаніі, каардынуючы рэакцыю на сітуацыю.
Стрымана выказваючыся ў чацвер раніцай, Хілі заявіў прэсе: «Ніякіх перамоў пра Украіну без Украіны быць не можа. Мы хочам трывалага міру і недапушчэння новага канфлікту і агрэсіі. І не варта забываць, што Расія застаецца пагрозай далёка за межамі Украіны».
Міністр абароны ЗША Піт Хэгсет у сваю чаргу адзначыў, што перамовы Трампа з Пуціным «безумоўна, гэта не здрада».
Выданне адзначае, што Украіна хоча, каб Вялікабрытанія і Еўропа занялі больш цвёрдую пазіцыю ў адносінах да ЗША, бо некаторыя еўрапейскія дыпламаты пабойваюцца, што калі Лондан не выкажацца, то і ніхто не выкажацца. Еўрапейцы баяцца, што Трамп і Пуцін могуць дамовіцца над галовамі еўрапейскіх урадаў.
Многія ў Еўропе, асабліва ва ўсходняй яе частцы, праводзяць паралелі з Мюнхенскім пагадненнем 1938 года. Латвійскі еўрадэпутат Рыхардс Колс у сваёй публікацыі ў сацсетцы X напісаў: «Мюнхен-2… Еўропа, рыхтуйся».
Некаторыя высокапастаўленыя еўрапейскія дыпламаты абвінавацілі адміністрацыю Трампа ў тым, што яна «кінула Украіну пад аўтобус» (ахвяравала Украінай у сваіх інтарэсах, пакінула яе без падтрымкі дзеля ўласнай выгады. — НН).
Адзін з іх адзначыў: «Ключавыя саступкі былі зробленыя загадзя», іншы назваў гэта катастрофай: «Чаму аслабляць нашу пазіцыю яшчэ да пачатку перамоў? Украіна прапанавала рэдказямельныя мінералы ўзамен. А што паабяцала Расія? Нічога! Яны захоўваюць свае імперскія амбіцыі».
Выданне звяртае ўвагу, што адміністрацыя ЗША не папярэдзіла сваіх партнёраў у Еўропе пра перамовы з Пуціным. Так, кіраўніца замежнапалітычнага ведамства ЕС Кая Калас правяла перамовы з віцэ-прэзідэнтам ЗША Джэймсам Вэнсам на саміце па штучным інтэлекце ў Парыжы, у той час як Трамп у гэты момант размаўляў з Пуціным.
Пасля заканчэння сустрэчы Калас апублікавала фота са старшынёй Еўракамісіі Урсулай фон дэр Ляен і Вэнсам у раскошным парыжскім палацы XVII стагоддзя, дадаўшы подпіс: «Добрая сустрэча».
Згадаўшы супрацоўніцтва Пуціна з Паўночнай Карэяй, Кітаем і Іранам, Калас падкрэсліла: «Паколькі нашы праціўнікі каардынуюць свае дзеянні, мы павінны рабіць тое самае».
Праз гадзіну Трамп паведаміў у сацсетках пра свае перамовы з Пуціным, але Вэнс нічога не казаў пра іх ні Калас, ні фон дэр Ляен.
Адзін з высокапастаўленых чыноўнікаў брытанскага ўрада адзначыў выданню: «Украіна павінна быць за сталом перамоў і заставацца ў цэнтры любой дамоўленасці. Уявіце сабе, што Германія і ЗША заключаюць пагадненне аб перадачы Уэльса падчас Другой сусветнай вайны без удзелу Брытаніі».
Каментары
- Мистер Президент! Мы Вас выслушали, а теперь идите Вы по курсу русского военного корабля!