Птушкай 2025 года ў Беларусі стаў вялікі грыцук. Гэтая птушка ўключана ў Чырвоную кнігу Беларусі. Асноўныя месцы гнездавання — пойменныя заліўныя лугі, верхавыя і пераходныя балоты, сельгасугоддзі, закінутыя торфараспрацоўкі, піша Tochka.by.
Даследаванні паказалі, што вясновыя зборы вялікага грыцука ў пойме Прыпяці — найбуйнейшыя з вядомых у Еўропе. Максімальная колькасць гэтых птушак (20 тыс. асобін) была зарэгістраваная ў ваколіцах Турава ў 2014 годзе.
Вялікі грыцук — птушка з даўжынёй цела 36-44 см і вагой 160-500 г. Самцы трохі драбнейшыя за самак, а вонкава адрозніваюцца ад іх толькі ў шлюбны перыяд.
Англійскія арнітолагі высветлілі, што, нягледзячы на штогадовы распад пар вялікіх грыцукоў і зімоўцы на значных адлегласцях адзін ад аднаго, асобіны птушак кожную вясну зноў сыходзяцца ў ранейшых месцах гнездаванняў. Але адбываецца гэта толькі ў выпадку прылёту кожнай з птушак адной пары ў інтэрвале трох дзён. Калі нехта запазніўся, то птушкі знаходзяць новых партнёраў.
Вялікія грыцукі — даволі асцярожныя птушкі. Яны выдатна бегаюць і плаваюць, але яшчэ лепш лётаюць. Не цураюцца іншых птушак і жывёл.
Месца для гнязда выбірае самец. Такаванне — даволі відовішчны спектакль, які праходзіць на ўчастку размяшчэння гнязда: самцы лётаюць, пагойдваючыся з боку ў бок, б'ючы напераменку то адным, то іншым крылом. Яны робяць глыбокія нырцы, выдаючы працяглыя гукі. Чужых самцоў, якія заляцелі на гэтую тэрыторыю, бесцырымонна выганяюць за яе межы.
Грыцукоў можна назваць добрымі бацькамі. У выпадку з'яўлення якіх-небудзь ворагаў птушкі абараняюць сваё гняздо — з гучнымі крыкамі вылятаюць насустрач. Могуць нават уступіць у паветраную сутычку з птушынымі драпежнікамі. Ахоўваюць яны і суседнія гнёзды.
Цяпер чытаюць
КДБ арыштаваў падазронага актывіста Паўла Бялюціна. У якой краіне гэта адбылося, невядома8
Каментары
Дзівосны новы сьвет