У Беларусі затрымалі літоўца, які абвінавачваецца на радзіме ў забойстве
Вайскоўцы Смаргонскай памежнай групы затрымалі 41-гадовага літоўца, які хаваецца на тэрыторыі Беларусі ад крымінальнага пераследу ў Літве. Інцыдэнт адбыўся 28 чэрвеня ў Гродне, паведаміў Дзяржаўны памежны камітэт.
Затрыманы мужчына абвінавачваецца ў тым, што забіў у літоўскім Салечніцкім раёне мясцовага жыхара. Раней ён ужо сядзеў у турме за розныя злачынствы, у тым ліку і за забойствы.
Паводле папярэдніх звестак, пасля здзяйснення забойства грамадзянін Літвы збег у Беларусь, дзе яму дапамаглі з дастаўкай і здымнай кватэрай у Гродне.
Па факце арганізацыі незаконнага ўезду, а таксама знаходжання літоўца на тэрыторыі Беларусі заведзеная крымінальная справа, па якой таксама затрыманыя ў якасці падазраваных два грамадзяніна Беларусі.
Пасля правядзення ўсіх неабходных працэсуальных дзеянняў, як паведамляецца, іншаземца чакае дэпартацыя ў Літву.
Каментары