У Польшчы выявілі «студэнцкую» частку візавага скандалу. Наступствы могуць закрануць і беларусаў
Дзясяткі тысяч замежнікаў маглі атрымаць студэнцкія візы і не прыступіць да вучобы.
Рэч у тым, што такія візы даюць магчымасць працаўладкавацца ў ЕС без атрымання дазволу на працу, таму многія «фіктыўныя» студэнты фактычна куплялі доступ да рынку працы па цане года навучання. Гэтая схема была выгадная і шэрагу прыватных ВНУ Польшчы, піша Mostmedia.io са спасылкай на Dziennik Gazeta Prawna.
Да вучобы не прыступала большасць атрымальнікаў студэнцкіх віз. Але курс вучобы яны аплачвалі — год у польскай установе адукацыі з выкладаннем на англійскай мове можа абыходзіцца прыкладна ў 3120 еўра. Некаторыя ВНУ гатовыя былі заплюшчваць вочы на студэнтаў, якія не з'явіліся на заняткі.
Схема аказалася настолькі распаўсюджанай, што ў некаторых ВНУ больш за палову студэнтаў былі замежнікамі. Напрыклад, у Вышэйшай школе кіравання і адміністрацыі ў Аполе замежнікі складаюць 61% усіх студэнтаў.
У ходзе допыту на камісіі па расследаванні скандалу віцэ-консул Польшчы ў Індыі Матэвуш Рэшчык прызнаў, што прыватныя навучальныя ўстановы Польшчы разглядаюць замежнікаў як спосаб заробку і не ў стане праверыць нават, ці сапраўды абітурыент скончыў сярэднюю школу ў сваёй краіне.
Прадстаўнік школы ў Аполе сказаў, што ў яе няма магчымасці даведацца, ці атрымаў іх патэнцыйны студэнт візу. Таму калі іншаземец не звяртаецца па атрыманне легітымацыі-аналага студэнцкага білета, — ВНУ мяркуе, што той проста не заехаў у Польшчу.
Каб выключыць схему «фіктыўных» студэнтаў у будучыні, у Польшчы плануюць увесці змены для ВНУ. Яны павінны будуць правяраць, ці ёсць у патэнцыйных студэнтаў аналаг польскага атэстата сталасці.
Таксама кандыдатам давядзецца даказаць, што яны валодаюць польскай ці ангельскай. Для гэтага ўніверсітэты павінны будуць праводзіць сумоўі.
Схему маглі выкарыстоўваць пераважна студэнты з Афрыкі і Азіі. Але яе наступствы адчуюць і беларусы. Праверкі навучэнцаў ужо ўзмацніліся.
Паведамлялася аб некалькіх выпадках, калі беларускім студэнтам адмаўлялі ў новых візах, калі ўніверсітэты не пацвярджалі, што яны сапраўды там вучацца.
Акрамя таго, некаторым з тых, каму ўхвалілі заявы, візы выдалі на больш кароткія тэрміны — не на год, а на паўгода.
Трагедыя з 30‑гадовай доктаркай са Старобіна — пайшла выдаляць зуб мудрасці і памерла23
Каментары