Прэзідэнт Германіі прыехаў у Турцыю з мясам для дзёнер-кебаба ФОТАФАКТ
Франк-Вальтэр Штайнмаер прызямліўся ў Стамбуле напярэдадні. Разам з ім у Турцыю прыляцеў Арыф Келес — уладальнік закусачнай у Берліне.
Яго і яшчэ некалькіх чалавек Штайнмаер узяў у паездку як прадстаўнікоў нямецка-турэцкай міграцыі, піша Bild.de.
Акрамя таго, на борце самалёта Штайнмаера аказалася 60 кілаграм мяса для турэцкага дзёнер-кебаба. У час урачыстага прыёму ў летняй рэзідэнцыі пасла ФРГ прэзідэнт Германіі дапамагаў гатаваць страву.
Візіт Штайнмаера быў прымеркаваны да 100-годдзя з дня ўстанаўлення дыпламатычных адносін паміж Германіяй і Турцыяй.
На сённяшні дзень у Нямеччыне пражывае каля трох мільёнаў чалавек турэцкага паходжання. Па словах Штайнмаера, яны «дапамагаюць фармаваць і фармуюць наша грамадства». Рабочыя мігранты з Турцыі сталі прыязджаць у ФРГ, пачынаючы з 1960-х гадоў.
Візіт у Турцыю — няпростае падарожжа для Штайнмаера. Справа ў тым, што прэзідэнт Рэджэп Таіп Эрдаган апошнім часам палохае Захад, апелюючы да баевікоў ХАМАС. Так, усяго тры дні таму Эрдаган прыняў у Анкары кіраўніка знешнепалітычнага ведамства ХАМАС Ісмаіла Ханію і назваў тэрарыстычную арганізацыю «групай супраціву».
Падчас публічнага выступу Штайнмаера ў Турцыі некалькі дзясяткаў чалавек спрабавалі сарваць ягоную прамову лозунгамі з асуджэннем Нямеччыны і Ізраіля. Некаторыя ўдзельнікі акцыі трымалі ў руках фотаздымкі, на якіх прэм'ер-міністру Ізраіля Біньяміну Нетаньяху і Штайнмаеру былі прымаляваныя вусы Адольфа Гітлера. Сам Эрдаган у гэты час знаходзіўся з афіцыйным візітам у Іраку.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд18
Каментары