Фінансавы кансультант вярнуўся з-за мяжы. Яму пагражае да 12 гадоў за «заклікі да санкцыяў»
46-гадовы Уладзімір Нікіцін з'язджаў у Польшчу, але ўрэшце вярнуўся.
Уладзіміру Нікіціну 46 гадоў. Ён мінчук, у 2000-м скончыў Беларускі дзяржаўны эканамічны ўніверсітэт па спецыяльнасці «Кіраванне продажамі». А ў 2009-м годзе Уладзімір паступіў у Расійскую акадэмію народнай гаспадаркі і дзяржаўнай службы пры Прэзідэнце Расіі на магістратуру ў галіне фінансаў, якую скончыў у маі 2011-га.
Кар'еру фінансавага аналітыка мужчына пачаў у кампаніі VDS у 2004-м. Уладзімір таксама вёў трэнінгі і адукацыйныя курсы па кіраванні фінансамі для кампаніяў. Апошняе вядомае месца працы мужчыны — фінансавы кантралёр у Belkanton Group, буйной кампаніі-дыстрыб'ютары канцылярскіх тавараў, якая, сярод іншага, валодае сеткай крамаў Афістон і часопісам Office Life.
Мяркуючы па ягоным Linkedin, не пазней за ліпень 2023-га Уладзімір звольніўся і пераехаў жыць у Польшчу. Імаверна, яго затрымалі па вяртанні ў Беларусь.
Дзейнасць ІП Уладзіміра прыпыненая з 5 лістапада 2023-га года.
Дата затрымання мужчыны невядомая. Суд над Уладзімірам пачнецца 29 красавіка ў Мінскім гарадскім судзе. За «заклікі да санкцыяў» мужчыне пагражае ад чатырох да дванаццаці гадоў калоніі. Сутнасць абвінавачання невядомая.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс15
Каментары