Выставу да юбілею Быкава згортваюць праз 10 дзён пасля адкрыцця
Экспазіцыю да 100-годдзя народнага пісьменніка планавалі паказваць у Дзяржаўным музеі гісторыі беларускай літаратуры да 5 мая, але перадумалі. Яна пратрымалася толькі 10 дзён.
Згорнуць яе 5 лютага. Пра гэта стала вядома чытачу «Нашай Нівы», які тэлефанаваў у музей даведацца пра час працы выставы.
«Самі думалі, што будзе даўжэй, але так выйшла», — патлумачылі яму, не называючы прычынаў для датэрміновага закрыцця выставы.
Часовую экспазіцыю «Жыццё праз абрысы і лініі», прымеркаваную да 100-годдзя з дня нараджэння Васіля Быкава, адкрылі 25 студзеня.
Адметнасць выставы ў тым, што яна мае не толькі дакументальна-літаратурны складнік, але і адкрывае пісьменніка як мастака.
Сярод артэфактаў, напрыклад, намаляваная схема падключэння стацыянарнага камп'ютара — якімі дратамі падключаюцца манітор, прынтар, клавіятура і іншыя прылады.
У экспазіцыі прадстаўлена больш за 70 графічных і жывапісных работ Васіля Быкава. Гэта яго замалёўкі краявідаў, хат, падворкаў з часоў дзяцінства, а таксама ўспаміны аб вайне, выпадкі з жыцця, самаіранічныя накіды, засваенне аўтамабільнай справы, будаўніцтва дачы ў Ждановічах.
У кнізе ўспамінаў «Доўгая дарога дадому» Васіль Быкаў пісаў: «Выяўленчае мастацтва ўвайшло ў маю душу з малюнкаў, кніжных ілюстрацый. Асабліва захаплялі гравюры ў старых кнігах Жуля Верна ды іншых».
Васіль Быкаў нарадзіўся 19 чэрвеня 1924 года. Па сканчэнні 8 класаў Кубліцкай сярэдняй школы будучы пісьменнік паступіў у Віцебскую мастацкую вучэльню. Аднак увосень 1940 года праз недахоп грошай і адмену дзяржаўных стыпендый пакінуў навучанне.
Пасля вайны і дэмабілізацыі ў 1947-м Быкаў прыехаў у Мінск, дзе зноў планаваў паступіць у мастацкую вучэльню. Але ў выніку трапіў у Гродна, дзе некаторы час працаваў у мастацкіх майстэрнях.
***
Васіль Быкаў казаў пра рэжым Лукашэнкі, што «краінай кіруе хунта». Дагэтуль Быкаў успрымаецца лукашэнкаўцамі як чужародны. Беларусы ж лічаць Быкава сумленнем нацыі. На яго пахаванне ў 2003 годзе прыйшлі тысячы суайчыннікаў.
«Наша Нiва» — бастыён беларушчыны
ПАДТРЫМАЦЬГлядзіце таксама:
-
Галоўная зброя — відэаплатформы і сацсеткі. Стала вядома, як лукашэнкаўская прапаганда спрабуе ўплываць на вынікі польскіх выбараў
-
Брэсцкі губернатар прапануе, каб гандлёвыя сеткі рабілі перадаплату за яшчэ не вырашчаную гародніну
-
«У мяне свой прэзідэнт, мая жонка прэзідэнт». Раней невядомае пра Сяргея Ціханоўскага расказала ягоная адвакатка
Цяпер чытаюць
Беларускі IT-мільярдэр Гурскі: Маю першую жонку забіў гемблер4
Каментары