Што вядома пра новага міністра аховы здароўя Аляксандра Хаджаева?
Былы кіраўнік РНПЦ псіхіятрыі пачынаў працу побач з Уладзімірам Каранікам у РНПЦ анкалогіі. А бацька Хаджаева быў першым намеснікам міністра здароўя.
Новым міністрам аховы здароўя прызначаны 44-гадовы Аляксандр Хаджаеў. «Белпол» прадаставіў «Нашай Ніве» анкетныя звесткі чыноўніка.
Хаджаеў нарадзіўся ў 1980 годзе ў Лепелі. Ён працягвае медыцынскую дынастыю.
Бацька чыноўніка, Валер Хаджаеў, працаваў галоўным доктарам Лепельскай раённай бальніцы. Пасля перайшоў ва ўпраўленне аховы здароўя аблвыканкама, папрацаваў і непасрэдна ў Міністэрстве здароўя, дайшоў да пасады першага намесніка міністра.
У 2010-м Валер Хаджаеў быў супрацоўнікам Адміністрацыі прэзідэнта. Нейкі час ён працаваў і генеральным дырэктарам «Белмедтэхнікі». Цяпер ён фармальна пенсіянер, але працягвае рабіць гендырэктарам расійскай фармацэўтычнай кампаніі «Пскоў Фарма».
Што да Аляксандра Хаджаева, то ён пачынаў сваю кар'еру ў РНПЦ анкалогіі і медыцынскай радыялогіі ім. М. Аляксандрава. Менавіта там быў загадчыкам аддзялення Уладзімір Каранік, які пасля дарос да міністра здароўя, а цяпер працуе губернатарам Гродзеншчыны.
Пасля Аляксандр Хаджаеў працаваў у 6-й гарадской клінічнай бальніцы і ў Беларускай медыцынскай акадэміі паслядыпломнай адукацыі. Апошні час ён узначальваў РНПЦ псіхічнага здароўя.
Жонка новага міністра, Ала Хаджаева, юрыстка. Працуе ў «ЭкспартМегаТранс».
Сям'я жыве ў аграгарадку Лясны пад Мінскам.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі21
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4141
Каментары