19-гадовага экс-палітвязня затрымалі па новай справе. Прычым затрымлівалі ў прысутнасці аднакурснікаў
У Высокаўскім аграрным каледжы ў Брэсцкай вобласці паказальна арыштавалі дваіх навучэнцаў, падазраваных у знявазе дзяржаўных сімвалаў Беларусі (арт. 370 КК). Санкцыю на затрыманне зачытаў пракурор Камянецкага раёна ў прысутнасці навучэнцаў.
Як паведаміла Генпракуратура, хлопцы нібыта ў ноч на 15 мая сарвалі тры дзяржаўныя сцягі на фасадах установы адукацыі, гандлёвага аб'екта і аддзялення пошты ў вёсцы Войскай.
Па інфармацыі «Берасцейскай вясны», адзін з затрыманых — 19-гадовы Елісей Кузняцоў, які нядаўна адбыў пакаранне па палітычнай крымінальнай справе. У лістападзе 2021 года яго асудзілі да 2,5 года «хатняй хіміі». У красавіку 2022 года яму ўзмацнілі пакаранне і перавялі ў калонію на 7,5 месяца. У снежні Елісей выйшаў на волю з наваполацкай калоніі № 1.
Каментары