Вынеслі жорсткі прысуд «рэйкаваму партызану» Віталю Мельніку, якому пры затрыманні прастрэлілі калені
Мінскі абласны суд у закрытым рэжыме 22 снежня прыгаварыў яго да 13 гадоў зняволення.
Судовы працэс вяла суддзя Анжаліка Данілава.
Суд прызнаў Віталя Мельніка вінаватым па пяці артыкулах Крымінальнага кодэкса:
— ч. 4 арт. 309 — наўмыснае прывядзенне ў непрыдатнасць транспартнага сродку або шляхоў зносін;
— ч. 2 арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў;
— ч. 1 арт. 368 — абраза Лукашэнкі;
— ч. 3 арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў, здзейсненыя групай асоб альбо паўторна;
— ч. 1 арт. 289 — акт тэрарызму.
Вядома, што мужчына пражывае ў пасёлку Хадакова Мінскага раёна, у яго ёсць маленькае дзіця.
Сям'я лічыць, што Віталь не мае дачынення да выстаўленых артыкулаў, і звязвае яго затрыманне з помстай мясцовага суддзі, а таксама з тым, што раней у Віталя была судзімасць.
У адпаведнасці з матэрыяламі справы, у ноч з 24 на 25 сакавіка 2022 года на перагоне Навасады — Барысаў, паблізу в. Стайкі Барысаўскага раёна, Мельнік падпаліў рэлейную шафу святлафора аўтаматычнай блакіроўкі, чым прывёў у непрыдатны для эксплуатацыі стан яго прыборы і элементы.
«У выніку — парушылася праца сігнальных установак аўтаматычнай блакіроўкі, а таксама не быў забяспечаны стан абароненасці руху транспартных сродкаў чыгуначнага транспарту — адбылася затрымка 22 грузавых і 17 пасажырскіх цягнікоў. Пры гэтым мела месца недапушчальная рызыка ўзнікнення транспартных здарэнняў і іх наступстваў у выглядзе крушэння, аварыі рухомага складу, прычынення шкоды навакольнаму асяроддзю, маёмасці юрыдычных і фізічных асоб, парушэнне нармальнай працы Беларускай чыгункі».
Акрамя таго, 14 і 21 жніўня 2020 года, а таксама 1 сакавіка 2022 года Мельнік размясціў у інтэрнэце паведамленні з відавочна негатыўнай ацэнкай Аляксандра Лукашэнкі, якія зневажаюць яго гонар і годнасць.
Па сукупнасці абвінавачанняў, вынесеных судом шляхам іх частковага складання, канчатковае пакаранне склала 13 гадоў пазбаўлення волі ва ўмовах асобага рэжыму. Таксама ён мусіць сплаціць 300 базавых велічынь штрафу (9600 рублёў).
Каментары
Навошта вы гэтую хлусню пішыце. Умовы разныя, але у нас шмат больше удзельнічала ў барацьбе за свабоду чым ва украіне. Як вы можаце не паважаць так свой народ????