«Наша стратэгічнае цярпенне не бязмежнае». Іран пагражае Зяленскаму пасля прамовы ў Кангрэсе
Прадстаўнік Міністэрства замежных спраў Ірана Насер Канаані ў чацвер раскрытыкаваў заявы Уладзіміра Зяленскага пра вайсковую падтрымку Тэгеранам Масквы ў вайне супраць Украіны. Як паведамляе «Еўрапейская праўда», каментар Канаані быў апублікаваны на сайце іранскага МЗС.
У заяве іранскага дыпламата сцвярджаецца, што Іран «не пастаўляў ніякай вайсковай тэхнікі ніводнаму боку для выкарыстання ў вайне ва Украіне» і заўсёды паважаў тэрытарыяльную цэласнасць усіх краін, у тым ліку Украіны.
«Зяленскаму варта было б ведаць, што стратэгічнае цярпенне Ірана ў дачыненні да такіх беспадстаўных абвінавачванняў не з'яўляецца бязмежным», — заявіў прадстаўнік іранскага МЗС.
Таксама Канаані параіў украінскаму прэзідэнту «атрымаць урок з лёсу некаторых іншых палітычных лідараў, якія задавольваліся падтрымкай ЗША».
Раней у прамове перад абедзвюма палатамі Кангрэса ЗША Зяленскі заявіў пра вайсковую падтрымку Іранам Расіі. «Калі Расія не дастае да нашых гарадоў артылерыяй, яна спрабуе знішчыць іх ракетамі. Больш за тое, Расія знайшла саўдзельніка ў гэтай генацыднай палітыцы — Іран. Іранскія забойчыя дроны, якія ідуць у Расію сотнямі, сталі пагрозай для нашай крытычнай інфраструктуры. Так адзін тэрарыст знаходзіць іншага. Пытанне часу, калі яны ўдараць па іншых вашых хаўрусніках, калі мы не спынім іх цяпер», — сказаў ён.
Як вядома, Расія апошнія некалькі месяцаў актыўна выкарыстоўвала іранскія беспілотнікі-камікадзэ Shahed, выдаючы іх за расійскія дроны «Герань», а таксама вяла перамовы з Тэгеранам пра пастаўкі дадатковай зброі, перш за ўсё ракет. Але афіцыйна Масква і Тэгеран гэта адмаўляюць.
Цяпер чытаюць
Пашпарты беларусаў, якія галасуюць на выбарах у КР, апрацуе кампанія, у якой апошнюю ўцечку выявілі ў 2026-м, а заснавальнікі — расіяне62
Каментары