«На плошчы было шмат людзей» — што кажуць відавочцы ўдару па Вінніцы?
BBC паведамляе, што падчас ракетнага абстрэлу цэнтральнай часткі горада на плошчы было шмат людзей, і ніхто з іх не ішоў у сховішча, нягледзячы на сігналы паветранай трывогі.
Паводле слоў карэспандэнткі, Вінніца да сённяшняга дня заставалася бяспечным горадам, які часта выбіралі для пераезду ўкраінцы з іншых рэгіёнаў, дзе цяпер ідуць баявыя дзеянні.
Плошча, па якой білі расійскія ракеты, размешчаная на вялікім скрыжаванні, з якога можна дабрацца ў любую частку горада. Тут людзі чакалі транспарт, пілі каву ці ішлі па сваіх справах.
У размешчаным на плошчы офісным цэнтры знаходзілася клініка, кавярня, атэлье па пашыве адзення, кружкі для дзіцячага развіцця і вольнага часу. Менавіта таму тут заўжды было людна.
Непасрэдна на месцы выбуху — стаянка таксі, таму значная частка загінулых — менавіта таксісты.
Адзін з пацярпелых таксістаў распавёў, што перад выбухам яму патэлефанаваў знаёмы і запрасіў на каву. Там, дзе ён да гэтага стаяў, і разарвалася ракета.
Па звестках паліцыі, цалкам згарэла прыватная клініка, у якой маглі быць як лекары, так і пацыенты. Аднак афіцыйнага пацвярджэння гэтай інфармацыі пакуль няма.
Каментары