Праўладны канал пацвердзіў: страляў у «Каскадзе» сапраўды Андрэй Паршын
Адзін з праўладных тэлеграм-канал пацвердзіў інфармацыю, што ў жылым комплексе «Каскад» у Мінску адбылася бойка з удзелам былога кіраўніка ГУБАЗіК Андрэя Паршына, у выніку якой адзін чалавек атрымаў агнястрэльнае раненне. Там жа былі апублікаваныя кадры з месца падзей.
Сцвярджаецца, што на Паршына ля пад'езда напаў малады чалавек па імені Яўген Уладзіміравіч Д. Падкрэсліваецца, што малады чалавек «выглядае моцна здаравейшым за свае гады», то-бок робіцца спроба затушаваць тое, што ён непаўналетні. Узрост хлопца не называецца. На скрыншоце з фота ён выглядае сапраўды вельмі высокім, але гэта непаўнагадовасці не адмяняе і ніякім апраўданнем не з'яўляецца.
Па версіі телеграм-канала, з Яўгенам, які нібыта не жыхар гэтага раёна, было пяцёра яго сяброў, якія «бясчынствавалі каля пад'езда» і «на заўвагі рэагавалі вельмі агрэсіўна» (стандартнае абвінавачванне з міліцэйскіх пратаколаў, якое ўжо дзясяткі гадоў прымяняецца да тысяч людзей, нават самых мяккіх і інтэлігентных). У Яўгена пры сабе нібыта быў нейкі ланцуг (што за ён, не ўдакладняецца). Таксама робіцца спроба дыскрэдытаваць Яўгена праз ягонага бацьку: маўляў, той «чатыры разы судзімы», а «яблычка ад яблыні…» Пацвярджэння гэтаму «факту» ніякага няма, прапануецца верыць на слова.
Праўладны канал піша, што Паршын сапраўды стрэліў у маладога чалавека з траўматычнага пісталета пасля таго, як той «паспрабаваў забраць зброю». Як сцвярджаецца, ягонаму здароўю нічога не пагражае — стрэл быў у «мяккія тканкі», кулю вынялі пінцэтам і хлопец ужо амаль здаровы.
На кадрах, апублікаваных у канале, ёсць два моманты: нібыта момант нападу і спроба забраць у Паршына зброю. Відэа няма: верагодна, таму, што на ім Паршын выглядае далёка не такім несправядліва пакрыўджаным рыцарам, якім яго хочуць прадставіць. Ці будзе грамадству дадзена якая-небудзь дадатковая інфармацыя і каментарый з сапраўды афіцыйных крыніц — пабачым.
Чытайце таксама:
Стала вядома, з чаго Паршын мог страляць па падлетку
«Жыву ў свабоднай краіне»: падлетак пасадзіў на зямлю экс-кіраўніка ГУБАЗіКа. Той у адказ пачаў страляць ПАДРАБЯЗНАСЦІ
Страляніна па падлетку ў «Каскадзе»: што вядома?
Цяпер чытаюць
Стала вядома, хто лётаў на Шры-Ланку разам з Анжалікай Мельнікавай і яе агентам9
Каментары