У ноч на 24 чэрвеня адзначаецца народнае свята летняга сонцастаяння. Сабралі некалькі варыянтаў для беларусаў унутры краіны і за мяжой, дзе ў пятніцу і на выходныя можна адсвяткаваць Купалле з карагодамі і скокамі праз вогнішча.
Музей Янкі Купалы
Літаратурны музей запрашае на «Купальскаю ноч у Купалавым доме», якая адбудзецца напярэдадні дня нараджэння паэта.
У праграме свята: традыцыйны купальскі вечар з удзелам фальклорнага гурта «Этнасуполка» Беларускага дзяржаўнага ўніверсітэта культуры і мастацтваў, з майстар-класамі па пляценні купальскіх вянкоў і старадаўнімі песнямі і танцамі.
Калі: 24 чэрвеня ў 18:30.
Квіток: уваход вольны.
Сула
У парку-музеі інтэрактыўнай гісторыі наведнікаў чакаюць традыцыйныя гульні, спаборніцтвы і разнастайныя анімацыйныя кропкі, якія знаёмяць са старонкамі старадаўняга летняга свята.
Якія купальскія традацыі будуць у праграме? Гульні і майстар-класы па сярэднявечных танцах, выпрабаванні сілы і спрыту, карагоды, сустрэча з персанажамі беларускай міфалогіі. І, канечне ж, распальванне святочнага вогнішча і скокі праз агонь.
Калі: 25 і 26 чэрвеня, 2, 3, 9 і 10 ліпеня.
Квіток: для дарослых — 25 рублёў (калі падпісацца на адну з сацсетак парка — 20 рублёў), для дзяцей — 15 рублёў, да 7 год — бясплатна.
Музей народнай архітэктуры і побыту
«Менавіта ў купальскую ноч кожны прагнуў адшукаць папараць-кветку і авалодаць усімі ведамі зямлі. А вядзьмаркі і чараўнікі карысталіся магчымасцю ператварыцца на адну ноч у змей, каб нарабіць шкоды людзям», — заваблівае музей.
Тут таксама можна адсвяткаваць Купалле па народных традыцыях. Пляценне вянкоў, шэсце з традыцыйнымі песнямі, вогнішча і карагоды, варажба на вянках і зеляніне… У праграме таксама майстар-клас па традыцыйных танцах пад беларускія народныя інструменты і выступленні фальклорных калектываў.
Калі: 25 чэрвеня з 18-й да 21-й гадзіны.
Квіток: для дарослых — 10 рублёў, для студэнтаў ВНУ — 6 рублёў, для школьнікаў, навучэнцаў прафесійна-тэхнічных, сярэдне-спецыяльных устаноў адукацыі — 4,5 рубля, для дашкольнікаў — бясплатна.
Для беларусаў за мяжой: Вільня
У парку палаца ў Вэрках пад ліпамі будуць адзначаць містычнае свята самай кароткай ночы.
Наведнікам прапануюць пашукаць папараць-кветку, сплесці вянкі, сабраць травы з лугоў, патанчыць каля вогнішча, запусціць вянкі ў Вяллі, паспяваць і паслухаць народныя спевы.
Дарэчы, у Літве таксама Ëнінес, Купалле — афіцыйны выходны.
Калі: 24 чэрвеня з 19-й гадзіны.
Квіток: уваход вольны.
Святканні Купалля будуць таксама напачатку ліпеня (як у краіне, так і ў дыяспарах), дакладная праграма і месцы будуць вядомы пазней.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары