Сёлета на факультэт журналістыкі БДУ на спецыяльнасці «журналістыка» і «журналістыка міжнародная» можна будзе паступіць толькі на бюджэт. Платнай формы не прадугледжваецца. З чым звязаная такая палітыка ВНУ, расказаў падчас прэс-канферэнцыі начальнік галоўнага упраўлення прафесійнай адукацыі Міністэрства адукацыі Беларусі Сяргей Каспяровіч. Аказалася, што ў галаве цяпер патрэбы толькі дзяржаўнай прэсы.
Чыноўнік спачатку панаракаў на тое, што з платнай формай увогуле шмат клопату:
«Фарміраванне лічбаў прыёму на бюджэтную і платную формы — гэта сур'ёзная і карпатлівая праца, звязаная з аналізам патрэбы адпаведных арганізацый, дамоваў, якія заключаныя ва ўстанове адукацыі з заказчыкамі кадраў».
А далей у тлумачэнні прагучалі выразныя ідэалагічныя ноткі:
«Сёння акцэнт дзяржаўнай інфармацыйнай палітыкі робіцца ў бок развіцця дзяржаўных СМІ. Ва ўсіх абітурыентаў ёсць права ўдзельнічаць у конкурсе і паступіць на бюджэтную форму і, адпаведна, затым быць размеркаванымі ў любую арганізацыю інфармацыйнага сектара. У першую чаргу — заказчыка кадраў».
Відаць, памкненнямі, каб 100% выпускнікоў журфака праходзілі дзяржаўнае абавязковае размеркаванне, то-бок лішнія некалькі гадоў знаходзіліся пад дадатковым кантролем, і тлумачыцца гэтае рашэнне.
Пры гэтым Каспяровіч адзначыў, што «прыём на спецыяльнасць «журналістыка» таксама ёсць і ў іншых установах адукацыі. Напрыклад — у Гродзенскім дзяржаўным універсітэце імя Янкі Купалы». А ў цэлым па ВНУ няма тэндэнцыі да скарачэння платных месцаў.
Каментары