Урад прыняў пастанову аб санкцыях: у «чорны спіс» патрапіла мяса, малако, кандытарка і садавіна з ЕС, ЗША і Канады. Што гэта значыць?
Савет Міністраў Беларусі прыняў пастанову №700 «Аб прымяненні спецыяльных мер у дачыненні да асобных відаў тавараў». У гэтай пастанове вызначылі пэўныя катэгорыі тавараў, забароненыя да ўвозу і рэалізацыі ў Беларусі з краін ЕС, ЗША, Канады, Нарвегіі, Албаніі, Ісландыі, Паўночнай Македоніі, Злучанага Каралеўства, Чарнагорыі і Швейцарыі.
Пастанова №700 Савет Міністраў прыняў 6 снежня гэтага года. Як напісана ў самім дакуменце, яе прынялі, каб «забяспечыць абарону нацыянальных інтарэсаў Рэспублікі Беларусь».
Што нельга будзе ўвозіць?
Спіс забароненых тавараў досыць шырокі і выглядае так:
- жывыя свінні,
- мяса буйной рагатай жывёлы (БРЖ), свежае, ахалоджанае, замарожанае,
- свежая, ахалоджаная і замарожаная свініна,
- субпрадукты БРЖ і іншых жывёл,
- мяса і харчовыя субпрадукты хатняй птушкі,
- салёнае мяса, сушанае і вэнджанае, харчовая мука з мяса і мясных субпрадуктаў,
- малако і малочная прадукцыя, за выключэннем безлактознай прадукцыі,
- гародніна, за выключэннем пасяўнога матэрыялу,
- фрукты і арэхі,
- тлушч свіней, птушкі, БРБ, авечак і коз, лярд-стэарын і іншыя жывёльныя масла,
- каўбасы і аналагічныя прадукты,
- кандытарскія вырабы (акрамя какава-парашку),
- соль,
- іншыя харчовыя прадукты (коды ТН ЗЭД 1901 90, 2106 90).
Забарона не закранае тавары для асабістага спажывання, дзіцячага харчавання і крытычнага імпарту.
Калі пачне дзейнічаць забарона?
Пастанова будзе дзейнічаць на працягу 6 месяцаў з 1 студзеня 2022 года.
Цяпер з паліц увесь імпарт будуць здымаць?
Не. Пастанова не распаўсюджваецца на тавары, што былі ці будуць увезеныя да 1 студзеня 2022 года, калі яно ўступіць у сілу.
Хто можа ўвозіць «санкцыёнку»?
Звычайныя людзі, калі вязуць з-за мяжы нешта для асабістага спажывання. Вытворцы для перапрацоўкі ў межах спецыяльных квот.
А што будзе замест забароненых тавараў?
Савет Міністраў у сваёй пастанове патрабуе ад Міністэрства сельскай гаспадаркі, «Белдзяржхарчпрама», аблвыканкамаў і Мінгарвыканкама забяспечыць «насычэнне ўнутранага рынку шырокім асартыментам харчовай прадукцыі вытворчасці Рэспублікі Беларусь».
Між тым цікава, што згодна з пастанаўленнем, МАРГ і Міністэрства сельскай гаспадаркі будуць усталёўваць спецыяльныя квоты на асобныя віды тавараў, каб «забяспечыць збалансаванасць на спажывецкім рынку».
Відаць, цэны вырастуць?
Савет Міністраў таксама патрабуе, каб МАРГ, Міністэрства сельскай гаспадаркі і «Белдзяржхарчпрам», а таксама вытворцы і гандлёвыя арганізацыі прытрымліваліся «ўстаноўленага параметра індэкса спажывецкіх коштаў».
Хто будзе кантраляваць увоз забароненых тавараў і што з расійскай мяжой?
Згодна з дакументам, на забароненыя тавары будзе распаўсюджвацца дзеянне спецыяльнага дакумента — палажэння «Аб парадку дзеяння ў дачыненні да забароненых тавараў». Яго прынялі, калі забаранялі аўтамабілі Shkoda і прадукцыю Nivea.
У прыватнасці, на прадуктовую санкцыёнку будзе распаўсюджвацца пункт 2 і раздзел 2.
Дык вось пункт два кажа пра тое, што кантраляваць увоз забароненых тавараў будзе мытня. А беларуска-расійскі ўчастак мяжы будуць патруляваць спецыяльныя «мабільныя падраздзяленні» мытнікаў, міліцыі, памежнікаў, а таксама Міністэрства сельскай гаспадаркі і падначаленыя яму арганізацыі.
Ці будуць у Беларусі знішчаць санкцыёнку, як гэта рабілі ў Расіі?
Раздзел два палажэння «Аб парадку дзеяння ў дачыненні да забароненых тавараў» больш міласэрны, чым расійскае заканадаўства. Арганізацыю, што прывезла забаронены тавар, абавяжуць яго вывезці. А за непадпарадкаванне патрабаванню службовай асобы па артыкуле 24.3 КаАП пагражае штраф ад 2 да 100 базавых велічынь.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч18
Каментары