Кіраўніку і консулу Генеральнага консульства Польшчы ў Гародні прапанавана пакінуць Беларусь, паведамляе МЗС.
У МЗС Беларусі 11 сакавіка быў выкліканы часовы павераны ў справах Польшчы ў Беларусі Марцін Вайцяхоўскі.
«У сувязі з празмерным, асіметрычным і дэструктыўным адказам Польшчы на правамоцнае і матываванае рашэнне Беларусі ў дачыненні да консула Генеральнага консульства Польшчы ў Брэсце Ежы Цімафеюка, а таксама ў сувязі з ігнараваннем адпаведных просьбаў беларускага боку, на падставе артыкулаў 23 і 55 Венскай канвенцыі аб консульскіх зносінах да польскага боку даведзена рашэнне аб немэтазгоднасці прысутнасці на тэрыторыі Беларусі кіраўніка і консула Генеральнага консульства Польшчы ў Гродне», — заявілі ў МЗС.
Польскаму боку ўручана нота з прапановай названым асобам пакінуць тэрыторыю Беларусі на працягу 48 гадзін.
Нагадаем, 9 сакавіка ў МЗС Беларусі быў выкліканы Часовы павераны ў справах Польшчы ў Беларусі Марцін Вайцяхоўскі. Падчас сустрэчы польскаму дыпламату быў заяўлены рашучы пратэст у сувязі з удзелам консула Генеральнага консульства Рэспублікі Польшча ў Брэсце Ежы Цімафеюка ў неафіцыйным мерапрыемстве, прысвечаным «дню выклятых жаўнераў», які прайшоў 28 лютага 2021 года ў Брэсце з удзелам прадстаўнікоў звязаных з Польшчай няўрадавых і моладзевых арганізацый.
На думку беларускага боку, удзелам ва ўказаным мерапрыемстве польскі прадстаўнік «груба парушыў нормы міжнароднага права, у прыватнасці — Венскую канвенцыю аб консульскіх зносінах».
Консулу Генеральнага консульства Рэспублікі Польшча ў Брэсце Ежы Цімафеюку прапанавана пакінуць тэрыторыю Рэспублікі Беларусь.
Нацыянальны Дзень памяці «выклятых жаўнераў» адзначаецца ў Польшчы 1 сакавіка з 2011 года. Гаворка ідзе пра ўдзельнікаў антысавецкага падполля, якія змагаліся за незалежнасць краіны.
Сярод сотні тысяч гэтых байцоў, якіх у Польшчы лічаць героямі-ветэранамі, былі і салдаты атрада Бурага, якія спалілі пяць вёсак на тэрыторыі з беларускім праваслаўным насельніцтвам.
Да 2021 года ўшанаванне памяці АКаўцаў не выклікала такой рэакцыі беларускіх уладаў. Цяпер гэта адбылося на фоне рэзкага пагаршэння беларуска-польскіх адносін, як і адносін Беларусі з іншымі еўрапейскімі краінамі.
Высылка з Беларусі адразу трох консулаў можа ўскладніць працэс выдачы віз беларусам.
Каментары