16 сьнежня маці анархіста Мікіты Емяльянава Анастасія Емяльянава атрымала ад сына ліст, адпраўлены з турмы 7 сьнежня. «Заўтра іду ў ШЫЗА», — напісаў маці Мікіта Емяльянаў. Жанчына не выключае, што сын і цяпер у карцары, піша Свабода.
«Нават ня ведаю, на які тэрмін Мікіту пакаралі карцарам. Маглі даць 7 дзён, а маглі і ўсе 10», — мяркуе Анастасія Емяльянава. Дакладнай прычыны пакараньня сына карцарам яна ня ведае. «Апошні карцар, у лістападзе, быў за парушэньне формы адзеньня. Пасьля гэтага Мікіта напісаў, што яшчэ двойчы атрымаў падобныя заўвагі, але за што дакладна цяпер пакаралі — невядома».
Анастасія Емяльянава лічыць, што да яе сына дадаткова чапляюцца празь ягоныя палітычныя погляды. «Мяркую, помсьцяць за ягоную пазыцыю, прэсуюць надзвычай жорстка, як і іншых анархістаў, а ён такі, што не саступае. Восеньню двойчы на знак пратэсту адмаўляўся ад ежы», — паведаміла Свабодзе маці палітвязьня Анастасія Емяльянава. Абвяшчаў сын галадаваньне ці гэта былі разавыя адмовы прымаць ежу, Анастасія ня ведае.
«Паведамляць пра ўмовы забаронена»
Анархіст Мікіта Емяльянаў адбывае 4 гады зьняволеньня ў крытай турме ў Магілёве, у яго строгі рэжым утрыманьня. Што вядома пра ўмовы, у якіх знаходзіцца Мікіта Емяльянаў?
«Пра ўмовы ім пісаць забаронена. Нават пра сукамэрнікаў нічога нельга пісаць — з кім сядзіш, якія адносіны. На спатканьнях казаў, што ў камэры ўмовы нармальныя. Быў рамонт, вакно новае — шклопакет, у камэры цёпла. А пра карцар нічога ня ведаю, акрамя агульных зьвестак, што цягам дня можна толькі сядзець на лаве, ложак адкідваецца толькі на ноч. А сам ён пра карцар нічога ня піша, на ўмовы ня скардзіцца — акрамя таго, што абмяжоўваюць ліставаньне», — расказала Анастасія Емяльянава.
Паводле зьвестак маці Мікіты Емяльянава, яму не перадалі частку лістоў ад сяброў, у тым ліку ад анархіста Зьмітра Паліенкі. Таксама ня ўсе ягоныя лісты даходзяць да адрасатаў.
Колеры Санта-Клаўса пад забаронай?
«Мікіта ўклаў ў ліст да мяне паштоўкі Ільлю Валавіку і Міхаілу Жамчужнаму. Спрабаваў падтрымаць, бо даведаўся, што іх пакаралі карцарам. Нічога асаблівага — проста словы маральнай падтрымкі. Але тыя паштоўкі да мяне не дайшлі. Іх забралі. Маўляў, ліставаньне паміж вязьнямі забаронена. Тое самае і зь лістамі яму. Нядаўна сябры адправілі яму ў лісьце калядныя налепкі, дык іх турэмная цэнзура забрала», — расказала Анастасія Емяльянава. Яна мяркуе, што турэмным цэнзарам не спадабаліся бел-чырвона-белыя колеры калядных налепак.
«Там у цэнтры малюнку Санта-Клаўс, а яго ж адзеньне не чырвона-зялёнае, а чырвонае з белым. Ну вось, пэўна, таму і не прапусьцілі», — мяркуе Анастасія Емяльянава.
Мікіта Емяльянаў вучыўся на 3 курсе БНТУ. Яго затрымалі ў кастрычніку 2019 году паводле падазрэньня ў нападах на будынак Менскага гарадзкога суду і СІЗА на Валадарскага. Свой учынак Мікіта Емяльянаў назваў пратэстам супраць перасьледу палітвязьняў.
У сакавіку 2020 году анархіст Мікіта Емяльянаў быў асуджаны на 7 гадоў зьняволеньня, у выніку апэляцыі пакараньне зьменшылі да 4 гадоў. Спачатку Мікіта Емяльянаў адбываў тэрмін у Бабруйскай калёніі, дзе яго зьмясьцілі ў ПКТ — памяшканьне камэрнага тыпу, потым як парушальніка рэжыму перавялі ў Магілёўскую крытую турму.
Праваабаронцы Беларусі прызналі анархіста Мікіту Емяльянава палітвязьнем і дамагаюцца перагляду ягонай справы.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай20
Каментары