У нядзелю, 25 кастрычніка, у Гродне падчас разгону мірнай акцыі пратэсту сілавікі затрымалі гісторыка і археолага, прафесара Алеся Краўцэвіча. Цяпер ён знаходзіцца ў ІЧУ, расказвае «Еўрарадыё» яго жонка Таццяна:
— Я не бачыла, як яго затрымлівалі. Мы разам стаялі ў счэпцы, пасля крыху адышлі — і якраз на нас пайшоў АМАП са шчытамі. Пачалася мітусня, я мужа спачатку бачыла, а пасля ён знік. Мы дамовіліся, калі што, сустрэцца каля машыны. Я чакала яго паўтары гадзіны і пасля ўжо паехала ў РАУС, — дзеліцца Таццяна.
Спачатку ў міліцыі не было ніякіх спіскаў затрыманых. Гродзенцы паказвалі фотаздымкі сваіх блізкіх тым, каго адпускалі з РАУС. Так Таццяна і даведалася, што яе муж сярод затрыманых.
— Пасля ўжо ад Алеся дайшла эсэмэс, якую ён напісаў у аўтазаку. Там было тры словы: «Затрымалі. Цэлы. Алесь». Увечары ў РАУС мне сказалі, што ён будзе знаходзіцца ў ІЧУ. Цяпер еду туды. Суда яшчэ не было. Невядома, ці будзе.
Ніякай падрабязнай інфармацыі не даюць: «Званіце, чакайце…» Адваката таксама пакуль няма. Спадзяёмся на штраф ці на тое, што, можа, яго адпусцяць, — расказвае жонка прафесара.
Паводле звесткак праваабаронцаў, у Гродне ўчора затрымалі каля 80 чалавек. Усяго па краіне — 523 чалавекі.
Гісторыкі выступілі са зваротам супраць затрымання Алеся Краўцэвіча
Цяпер чытаюць
Асуджаны за «Гаюн» да хіміі брат Ігара Лосіка ўцёк з Беларусі3
Каментары