38-гадовы Круты стаў першым віцэ-прэм'ерам, 44-гадовы Турчын — кіраўніком Мінскай вобласці
Міністр эканомікі Дзмітрый Круты прызначаны першым віцэ-прэм'ерам.
Аляксандр Турчын, які раней займаў гэту пасаду, узначаліў Мінскую вобласць.
На думку Лукашэнкі, Аляксандра Турчына час выводзіць на самастойную працу, каб «сур'ёзна на яго паглядзець і праверыць у справе».
«Я думаю, вы прапануеце кандыдатуру добрага міністра, які будзе патрыётам Беларусі, будзе годна весці дыялог не толькі на Усходзе, але і на Захадзе. Дарожныя карты (з Расіяй) пакуль застануцца за ім, будзем тут дапамагаць, наколькі трэба. Апора, падтрымка будзе нармальнай. Нам не трэба зараз мяняць кіраўніка нашай групы, тым больш няшмат засталося: літаральна некалькі дзён да заканчэння гэтай працы. Потым, калі будзе трэба і калі групы захаваюць працу, міністр спакойна замесціць гэтую пасаду», — выказаўся Лукашэнка пра Крутога.
Папярэдні кіраўнік Міншчыны Анатоль Ісачанка сышоў па стане здароўя — кажуць, у яго анкалогія. Па словах Лукашэнкі, ён будзе «адказным за Мінскую вобласць».
Хто зойме вызваленую пасаду міністра эканомікі, пакуль невядома.
Дзмітрый Круты
Нарадзіўся ў 1981 годзе ў Бялынічах. Дзяцінства правёў у Клічаве.
Скончыў Беларускі дзяржаўны тэхналагічны ўніверсітэт (2003), Акадэмію кіравання (2010).
У 2004—2006 — эканаміст у Міністэрстве лясной гаспадаркі. У 2006—2014 працаваў ва ўпраўленні ляснога комплексу Міністэрства эканомікі. У 2014—2018 — намеснік, пасля першы намеснік міністра эканомікі.
У 2018-2019 — міністр эканомікі.
Аляксандр Турчын
Нарадзіўся ў 1975 годзе ў Навагрудку. Скончыў Беларускі дзяржаўны эканамічны ўніверсітэт (2002), Акадэмію кіравання (2009).
Працаваў загадчыкам крамы ў Навагрудскім раёне, падатковым інспектарам у Навагрудскім раёне, галоўным кантралёрам-рэвізорам Міністэрства фінансаў па Навагрудскім раёне і Гродзенскай вобласці.
У 2004—2010 гадах працаваў спачатку начальнікам фінансавага аддзела, а затым намеснікам старшыні Карэліцкага райвыканкама. У 2010—2012 — старшыня камітэта па эканоміцы Мінскага аблвыканкама, у 2012-2015 — намеснік старшыні Мінскага аблвыканкама. У 2015—2016 — памочнік прэзідэнта па Гомельскай вобласці. У 2016—2018 — кіраўнік Апарату Савета міністраў.
У 2018—2019 — першы віцэ-прэм’ер.
Цяпер чытаюць
Замест вайны сланы ў новай кнізе Сашы Філіпенкі. І Масква3
Каментары