Са снежня з Мінска ў Полацк можна будзе даехаць хутчэй. Беларуская чыгунка запусціць паміж гарадамі хуткасны цягнік. Расклад ужо ёсць на сайце чыгункі, але квіткі пакуль купіць нельга, піша Tut.by.
Цягнік рэгіянальных ліній бізнэс-класа № 739Б Мінск-Пасажырскі — Полацк ужо дададзены ў расклад на сайце БЧ, хоць афіцыйна пра новы цягнік яшчэ не аб'явілі.
У даведачнай службе чыгункі кажуць: «Цягнік будзе прызначацца, але білетаў пакуль у продажы няма».
Мяркуючы па раскладзе, цягнік будзе курсіраваць з 10 снежня штодня. Адправіцца з Мінска ў 17.28, прыбудзе ў Полацк — у 21.03. Час паездкі — 3 гадзіны 35 хвілін.
Паміж Мінскам і Полацкім плануюць рабіць некалькі прыпынкаў: у Маладзечна (18.27), Вілейцы (18.54), Круляўшчызне (19.52).
З Полацка ў Мінск цягнік будзе адпраўляцца ў 6.19, прыбываць у Мінск — у 9.57. Паміж канчатковымі пунктамі запланаваны прыпынкі на тых жа станцыях: у Круляўшчызне (7.24), Вілейцы (8.17), Маладзечна (8.34).
Колькі будзе каштаваць білет на хуткасны цягнік, пакуль невядома.
Цяпер з Мінска ў Полацк можна дабрацца некалькімі спосабамі. Раз на тыдзень, па пятніцах, туды адпраўляецца прамы цягнік 683Б - ён у шляху 5 гадзін 15 хвілін. У раскладзе няма гэтага цягніка пасля 8 снежня - імаверна, яго адменяць.
Штодня ходзіць «кругасветны» 625Б Мінск - Віцебск. Ён прыбывае ў Полацк у 4.27, адлегласць паміж гэтым горадам і сталіцай праязджае за 6 гадзін 59 хвілін.
Яшчэ з Мінска ў Полацк можна трапіць праз Маладзечна: на электрычцы да гэтага горада і потым на дызель-цягніку да Полацка.
Каментары