30 лістапада Гомельскі абласны суд абвясціў прыгавор у дачыненні да 37-гадовага жыхара Гомельскага раёна, грамадзяніна Расійскай Федэрацыі. Ён абвінавачваўся ў забойстве 40-гадовага жыхара Гомеля, які працаваў таксістам. За ўчыненне забойства, а таксама за незаконныя дзеянні з агнястрэльнай зброяй і разбой расіянін прыгавораны да 22 гадоў пазбаўлення волі ва ўмовах ўзмоцненага рэжыму з канфіскацыяй маёмасці.
Таксама на карысць пацярпелай (жонкі загінулага) будзе спагнаная матэрыяльная шкода ў 1 тыс. рублёў і маральная ў 50 тыс. рублёў
Жонка забітага таксіста Алена заявіла журналістам пасля вынясення прысуду, што хацела б больш суровага пакарання для забойцы свайго мужа. Яна згодная з пазіцыяй абвінавачання, якое прасіла для абвінавачанага 25 гадоў строгага рэжыму. У сваю чаргу маці забітага заявіла, што яны хацелі б смяротнага пакарання для забойцы, але не патрабавалі гэтага на судзе.
Прысуд не набыў законнай моцы.
Злачынства было ўчыненае 16 сакавіка 2016 года. 40-гадовы жыхар Гомеля, супрацоўнік «Таксі 155 Альфа», паехаў на працу на машыне «Форд-Гэлаксі». Праз гадзіну ён па тэлефоне паведаміў жонцы, што едзе дадому, але знік.
Яго шукалі міліцыя, калегі, валанцёры. Днём 18 сакавіка цела зніклага з прыкметамі гвалтоўнай смерці было знойдзенае ў лесе каля вёскі Сасноўка.
Неўзабаве быў устаноўлены і падазраваны — жыхар вёскі 37-гадовы грамадзянін Расіі. Таксіста ён застрэліў з рэвальвера. Зброю абвінавачваны, паводле яго слоў, купіў раней на рынку ў Падмаскоўі. Падчас следства абвінавачваны, хоць і не адразу, прызнаўся ў злачынстве.
Абвінавачаны ў судзе сцвярджаў, што сапраўды забіў таксіста i завалодаў яго аўтамабілем, грашыма, мабільным тэлефонам, планшэтам, наборам інструментаў, навігатарам і гэтак далей (усяго на 24 тысячы дэнамінаваных рублёў), але зрабіў гэта спантанна. «То бок я хацеў учыніць разбой, завалодаць грашыма таксіста, але не хацеў яго забіваць, а толькі папалохаць пісталетам», — тлумачыў на судзе расіянін. Патрэбныя былі грошы, «на будаўнічыя матэрыялы, полікарбанат для цяпліцы», удакладняў абвінавачаны.
Ураджэнец Набярэжных Чалноў (Татарстан), ён у 2006 годзе быў судзімы за крадзеж, атрымаў умоўны тэрмін. Раней, з 1999 года, служыў у арміі на Паўночным Каўказе па кантракце. На пытанне, ці браў удзел у баявых дзеяннях, адказваць адмовіўся. Расіянін пазнаёміўся праз інтэрнэт з беларускай, жыхаркай Сасноўкі Гомельскага раёна, і пераехаў да яе, пара зарэгістравала шлюб. Жонка працавала лекарам. Дзеці нарадзіліся ў 2014 і 2015 гадах.
Каментары