Давыдзька і Дарафеева з'ездзілі ў турму ў Магілёве: «Харчаванне, як у рэстаране»
Члены грамадскай рады пры МУС, сярод якіх — старшыня Белтэлерадыёкампаніі Генадзь Давыдзька, сустаршыня Беларускага саюза жанчын Антаніна Морава і заслужаная артыстка Беларусі Ірына Дарафеева, наведалі ІЧУ і турму № 4 у Магілёве. Пра гэта паведамляе прэс-служба МУС.
Членам рады паказалі адрамантаваны ізалятар часовага ўтрымання. Менавіта сюды паступаюць падазраваныя ў здзяйсненні злачынстваў. Наведвальнікі заўважылі, што паветра ў камерах свежае, памацалі батарэі — гарачыя. У кожнай камеры ёсць радыё, шашкі, шахматы, Крымінальны кодэкс і мастацкая літаратура.
«Зазірнулі госці і ў сталовую ізалятара: на абед — капуста, рысавая каша з катлетай і кампот. Дарэчы, цана трохразовага харчавання людзей у ІЧУ абыходзіцца дзяржаве ў 10 рублёў 50 капеек на чалавека ў суткі», — гаворыцца ў рэпартажы МУС.
Пасля ІЧУ члены рады наведалі турму № 4. У адной з камер — 10 мужчын, на стале кнігі і жалезныя кубкі. На пытанне старшыні Белтэлерадыёкампаніі Генадзя Давыдзькі «Ці ёсць скаргі?» адказваюць адмоўна; «Ці хапае паветра?» — станоўча.
«Убачыўшы ўсё гэта, я думаю, трэба праводзіць экскурсіі для грамадзян проста для таго, каб разумелі, чым можа скончыцца супрацьпраўнае дзеянне, — адзначыў прафесар Мікалай Шчокін. — Адно магу сказаць: дзяржава годна ўтрымлівае тых, хто, магчыма, і не заслугоўвае такога догляду. Калі чалавек кагосьці забіў — то ўтрымліваюць яго цалкам гуманна, ніякіх абмежаванняў правоў або чагосьці падобнага мы тут не ўбачылі».
Гасцям установы таксама прапанавалі пакаштаваць турэмны абед — суп, смажаніна з салёным агурком, кампот з сухафруктаў, хлеб.
«Харчаванне на найвышэйшым узроўні, як у рэстаране, прызнаюся шчыра, я нават пакаштавала — вельмі смачна», — адзначыла Ірына Дарафеева, заслужаная артыстка Беларусі, а цяпер член Пастаяннай камісіі Палаты прадстаўнікоў Нацыянальнага сходу па адукацыі, культуры і навуцы.
Абагульняючы меркаванні калегаў, старшыня грамадскай рады пры МУС Генадзь Давыдзька адзначыў, што «турма пакінула ўражанне вельмі дзелавога асяроддзя».
«Такія месцы не павінны выклікаць прыемных эмоцый, але ўмовы вельмі добрыя, па чысціні, дысцыпліне, — адзначыў Давыдзька. — Супрацоўнікі ведаюць сваю працу, ведаюць і тыя, што знаходзяцца тут, за што сядзяць і чаму, ва ўсім прысутнічае парадак і арганізаванасць».
Цяпер чытаюць
Лукашэнка: Размова з Макронам доўжылася 1 гадзіну 40 хвілін. Пройдуць перамовы з прадстаўніком Францыі11
Каментары