Рух «За Свабоду» звярнуўся да Партыі БНФ, Аб`яднанай грамадзянскай партыі (АГП) і аргкамітэта па стварэнні партыі «Беларуская хрысціянская дэмакратыя» (БХД) з прапановай стварыць жаночы правацэнтрысцкі форум.
Ініцыятарам выступіла намесніца старшыні руху «За Свабоду» Галіна Скараход, паведамляе сайт pyx.by. На яе думку, сумесная праца пачалася падчас парламенцкіх выбараў 2012 года ў межах кампаніі «Жанчыны супраць фальсіфікацыяў», якую ініцыяваў «За Свабоду» пры падтрымцы АГП. З цягам часу да яе далучыліся прадстаўніцы Партыі БНФ, аргкамітэта БХД, Беларускай сацыял-дэмакратычнай партыі (Грамада) і Беларускай партыі левых «Справядлівы свет».
У межах жаночага правацэнтрысцкага форуму ёсць надзея «на паглыбленую супрацу ў межах кааліцыі і шырокае супрацоўніцтва з левымі партыямі і рухамі», лічыць Скараход, прапанову якой падтрымала Рада руху.
На будучых парламенцкіх выбарах рух «За Свабоду» можа ў тым ліку прапанаваць працу з жанчынамі-выбаршчыцамі ў падтрымку кандыдатаў-жанчын у межах кампаніі «Жанчыны за перамены». «Гендарная роўнасць — адна з базавых чалавечых каштоўнасцяў, якая ёсць індыкатарам гарманічнага развіцця грамадства, — адзначаецца ў звароце да правацэнтрысцкіх партый. — У развітых дэмакратычных краінах створаныя роўныя магчымасці для мужчынаў і жанчынаў удзельнічаць у палітычным жыцці і справядлівыя ўмовы для адкрытага суперніцтва».
«Сумесная праца будзе найбольш спрыяць актыўнаму адстойванню жанчынамі сваіх правоў, фарміраванню прывабнага іміджу жанчыны-палітыка і грамадскага лідара», — лічаць прадстаўнікі руху «За Свабоду».
Пагадненне аб стварэнні правацэнтрысцкай кааліцыі было падпісанае 9—11 снежня мінулага года ў Бруселі лідарамі руху «За Свабоду», АГП і аргкамітэта БХД.
Ці патрэбная беларуская мова тым, хто размаўляе па-руску? Азаронак задаўся такім пытаннем на СТБ, а выпускнік Акадэміі МУС прапанаваў замяніць урокі факультатывамі4444
Каментары