Мінсувязі і інфарматызацыі, Міністэрства па падатках і зборах, а таксама Мытны камітэт абмяркоўваюць, як спыніць паток тавараў з кітайскіх інтэрнэт-крам у Беларусь.
У рамках выставы TIBO асацыяцыя «Белінфакам» арганізавала круглы стол, на якім бізнес у сферы тэлекамунікацыі заклікаў дзяржаву кансультавацца з ім пры распрацоўцы нарматыўных актаў.
У адказ на заклікі прадстаўнікоў бізнесу першы намеснік міністра сувязі і інфарматызацыі Дзмітрый Шадко прапанаваў некалькі тэм, якія тыя маглі б дапамагчы распрацаваць. У прыватнасці, цяпер міністэрства сувязі ламае галаву, «як спыніць гандаль кітайскімі таварамі праз інтэрнэт».
— Чаму яго трэба спыняць? — здзівіўся Юрый Зісер, член праўлення «Белінфакам».
— Не ведаю, у мяне такое даручэнне, —адказаў Дзмітрый Шадко. А потым растлумачыў, што пакуль ва ўрада ніякіх канкрэтных планаў у гэтых адносінах няма, проста яны з калегамі з падатковай і мытні вядуць абмеркаванне, як вырашыць дадзеную праблему.
Сам намеснік міністра лічыць, што з дапамогай інструментаў, якія ёсць у руках у яго міністэрства, спыніць пастаўкі кітайскіх тавараў немагчыма.
Каментары