Краіны СНД падрыхтуюць план сумесных дзеянняў па мінімізацыі негатыўных наступстваў фінансавага крызісу ў Расіі, заявіў 16 снежня ў Мінску журналістам выканаўчы сакратар Садружнасці Сяргей Лебедзеў.
Ён браў удзел у апошнім сёлета пасяджэнні савета пастаянных паўнамоцных прадстаўнікоў дзяржаў Садружнасці пры статутных і іншых органах СНД.
Лебедзеў нагадаў, што ў 2008 годзе, у разгар сусветнага фінансавага крызісу, паводле рашэння саветаў кіраўнікоў дзяржаў і кіраўнікоў урадаў Садружнасці была створаная пастаянна дзейная нарада міністраў фінансаў з прыцягненнем кіраўнікоў нацыянальных банкаў. Сустрэчы праходзілі рэгулярна, за выключэннем гэтага года. Але, як зазначыў Лебедзеў, на апошнім пасяджэнні Савета кіраўнікоў урадаў у Ашхабадзе было прынятае рашэнне аб правядзенні тэрміновых кансультацый прадстаўнікоў ведамстваў, якія адказваюць за эканоміку і фінансы. Прычым, як падкрэсліў выканаўчы сакратар, такія кансультацыі было вырашана правесці як мага хутчэй.
Лебедзеў паведаміў, што кансультацыі адбыліся 12 снежня ў Маскве ў межах пасяджэння Эканамічнага савета СНД. У іх узялі ўдзел міністры эканомікі і адказныя за фінансавыя пытанні ў краінах Садружнасці. Паводле вынікаў кансультацый было прынятае рашэнне стварыць рабочую групу для падрыхтоўкі плана сумесных дзеянняў па мінімізацыі негатыўных наступстваў фінансавага крызісу ў Расіі.
Падчас пасяджэння Эканамсавета ў Маскве абмяркоўвалася таксама праблема паставак беларускага харчавання ў Расію. «Высновы будуць зробленыя. Прадстаўнікі іншых дзяржаў СНД падтрымалі інтэнсіўны дыялог на розных узроўнях паміж Беларуссю і Расіяй з мэтай найхутчэйшага выхаду з сітуацыі», — сказаў выканаўчы сакратар СНД.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары