Гэндальф — кандыдат на прэзыдэнцкія выбары-2015 ад інтэрнэт-актывістаў
Сацыяльная суполка «Мая краіна Беларусь», якая налічвае больш за 50 тысяч сябраў, вылучыць свайго кандыдата на прэзыдэнта. Актывісты вырашылі, што супрацьстаяць Лукашэнку павінен герой кніг Толкіена чараўнік Гэндальф, і шукаюць асобу, якая б пераўвасобілася ў гэтую ролю.
Галоўныя патрабаваньні да кандыдатаў — 35 гадоў, беларускае грамадзянства і «дастатковая адэкватнасьць». Стваральнікі суполкі «Мая краіна Беларусь» кажуць, што «праца ня пыльная» і абяцаюць будучаму кандыдату дапамогу ў кампаніі і зборы подпісаў.
На вылучэньне Гэндальфа ў прэзыдэнта натхніў украінскі Дарт Вэйдэр, які балятаваўся на прэзыдэнцкіх выбарах, але ня быў зарэгістраваны. Паводле арганізатараў, Гэндальф — добры чараўнік і сябра хобітаў, а хобіты, як вядома, падобныя да беларусаў. Як лічыць доктар Лант з Брыстальскага ўнівэрсытэту (Вялікабрытанія), Шыр — зелянінны край, дзе жылі Хобіты, — нагадвае Беларусь.
Вылучэньне на прэзыдэнцкія выбары Гэндальфа, паводле арганізатараў, мае высьмеяць рэжым і прадэманстраваць, што выбараў у краіне няма. Як заявіў адзін з ініцыятараў, які называе сябе Арагорнам, сынам Араторна, кампанія будзе пабудаваная на пазытыве і аб’яднае ўсіх беларусаў, якія хочуць лепшага жыцьця:
«Спокліч нашай кампаніі просты і зразумелы. Гэндальф — наш лідэр, які павядзе краіну да лепшага жыцьця. Гэндальф — наш кандыдат».
На пытаньне, што Гэндальф будзе рабіць, калі пераможа, арганізатары сьцьвярджаюць, што галоўнае цяпер — змаганьне супраць оркаў і супрацьстаяньне Мордару:
«Як вядома, у Маскве хацелі ўчора запаліць вока Саўрана. Гэта невыпадкова. Недзе там і знаходзіцца Мордар», — кажуць актывісты.
Паводле сюжэтаў Толкіенаўскіх апавяданьняў, Вялікае Вока Саўрана ёсьць сымбалем прыгнёту і страху.
А пакуль шукаецца адпаведны кандыдат, у сацыяльных сетках поўнай хадой ідзе фармаваньне каманды і папярэдняя агітацыя. Хэштэг кампаніі — #ГэндальфНашКандыдат
Цяпер чытаюць
«Дык дадому забяры алкаша абасцанага і выходжвай». Малады загадчык аддзялення бальніцы не стрымлівае сябе ў выразах у сацсетках25
Каментары