Саюз беларускіх пісьменнікаў абвясціў літаратурны конкурс імя Аляксандра Уласава
Конкурс маладых пісьменнікаў «Экслібрыс» невыпадкова названы ў гонар Уласава.
Выдавец, публіцыст, ён доўгія гады (1906 — 1914) з’яўляўся рэдактарам – выдаўцом газеты «Наша ніва», заахвоціў да працы ў рэдакцыі Янку Купалу, Якуба Коласа і Змітрака Бядулю. Сёлета споўніцца 140 гадоў з дня яго нараджэння.
На конкурс будуць прымацца творы на беларускай або рускай мове, напісаныя аўтарамі, якія маладзейшыя за 40 гадоў.
Прэтэндэнтам прапанаваныя наступныя жанры: эсэ (літаратуразнаўчае, сацыякультурнае, гістарычнае, краязнаўчае, этнаграфічнае), нарыс, публіцыстычны (аналітычны) артыкул, літаратурны агляд, рэцэнзія і інш.
Тэмы конкурсу наступныя: «Асоба ў прасторы і часе», «Аўтар. Герой. Чытач», «Мая ідэнтычнасць», «Пераадоленне абмежаванняў», «Суіснаванне і супрацьстаянне».
Але ў межах гэтых агульных тэм могуць быць раскрытыя больш вузкія і канкрэтныя тэмы. Назва твора можа быць любая. Галоўнае, каб агульны памер не перавышаў 20 тысяч знакаў з прабеламі.
У журы конкурсу ўваходзяць пісьменнік і крытык Сяргей Дубавец, пісьменнік Алесь Пашкевіч, літаратуразнаўцы Аляксандр Фядута і Ірына Шаўлякова, філосаф Вольга Шпарага.
Тэксты на конкурс можна дасылаць файламі ў фармаце.doc да 1 жніўня 2014 года на адрас [email protected], пазначыўшы тэмай ліста «Конкурс». У лісце мусіць быць наступная інфармацыя: імя, прозвішча, дата нараджэння ўдзельніка, кантактны нумар тэлефона і e-mail.
Пяць пераможцаў конкурсу атрымаюць найлепшыя рыдэры ў лінейцы кампаніі «Prestigio»— MultiReader Supreme 5664, а іх творы будуць змешчаныя ў электронных бібліятэках ebooks.prestigioplaza.com і e-kniga.by.
«Наша ніва» з’яўляецца адным з партнёраў конкурсу і плануе змясціць на сваіх старонках асобныя тэксты. Аднаго з удзельнікаў чакае спецыяльны прыз ад «НН».
Каментары